வெள்ளி, 10 மே, 2019

ஷேக்கினா.

 கேரள தொலைக்காட்சிகளில் ஒரு கத்தோலிக்க ஜிகினா !
 கத்தோலிக்க திருச்சபை லீலைகளை மறைக்கும் திரைச்சீலை !

ண்டைய எபிரேயு மொழியில் “ஷேக்கினா” (Shekinah) என்கிற வார்த்தைக்கு பல அர்த்தங்கள் உண்டு. கூடு அல்லது இருப்பிடம் அல்லது வசிப்பிடம் என்பது ஒரு அர்த்தம்.
 இந்த வார்த்தை பைபிளில் கிடையாது.

பண்டைய ரப்பானிய இலக்கியத்தில் உண்டு.

பண்டைய யூத மதத்தில் இருந்த பல்வேறு போக்குகளில் ஒன்றான கப்பாலிசத்தில் (kabbalism) இதே ஷேக்கினா என்கிற வார்த்தைக்கு இறையின் பெண் தன்மை கொண்ட (ஸெஃபிரா) புனிதமான ஒளி அல்லது நிலவின் ஒளி என்கிற ஒரு பொருளும் உண்டு.

இப்போது இந்த வார்த்தையைப் பற்றி ஆராய்வதல்ல எமது நோக்கம்.
கடந்த ஏப்ரல் மாதம் 28-ம் தேதி கேரள கத்தோலிக்கத் திருச்சபையின் பின்புலத்தில் துவங்கப்பட்டுள்ள தொலைக்காட்சியின் பெயர் ஷேக்கினா.

 பாலியல் வல்லுறவுக் குற்றங்கள், ஊழல்கள் எனத் தொடர்ந்து கேரள கத்தோலிக்க திருச்சபை அம்பலப்பட்டு, அதன் பெயர் கிறிஸ்தவர்களிடையே நாற்றமெடுக்கத் துவங்கியிருக்கும் நிலையில் தங்களைக் குறித்து நேர்மறையான செய்திகளை மக்களிடம் கொண்டு சேர்க்க வேண்டும் என்கிற நோக்கத்தோடு இந்த தொலைக்காட்சியை துவங்கியுள்ளதாக இது குறித்து வரும் செய்திகள் தெரிவிக்கின்றன.

நடப்பு நிகழ்வுகள் குறித்த செய்திகள் மற்றும் பொழுதுபோக்கு நிகழ்ச்சிகளோடும் தனது ஒளிபரப்பைத் துவங்கியுள்ள இத்தொலைக்காட்சியில் பிற வணிக விளம்பரங்கள் இல்லை (இப்போதைக்காவது) என்பது குறிப்பிடத்தக்கது.
“ஒற்றுமைக்கான செய்தி, நம்பிக்கை மற்றும் புனிதம்” போன்றவற்றை மக்களிடையே பரப்புவதே தமது நோக்கம் என தொலைக்காட்சியின் நிர்வாகத்தினர் தெரிவிக்கின்றனர்.
தற்போது கேரளாவில் மட்டும் ஒளிபரப்பாகும் இந்தத் தொலைக்காட்சியை ஆகஸ்ட் மாதத்திலிருந்து நாடெங்கும் விரிவுபடுத்தும் திட்டமும் உள்ளதாம்.

“விசுவாசிகள் கெட்ட செய்திகளால் சோர்ந்து போயிருக்கிறார்கள். அவர்களிடையே நற்செய்தியைப் பரப்புவதன் மூலம் ஆற்றுப்படுத்தும் வேலையை ஷேக்கினா தொலைக்காட்சி மேற்கொள்ளும்” என்கிறார் அதன் நிர்வாக இயக்குனர் சந்தோஷ் கருமாத்ரா.
 கத்தோலிக்க திருச்சபையின் கீழ் செயல்பட்டு வரும் ஷேக்கினா மினிஸ்ட்ரீஸ் எனும் திருச்சபையைச் சேர்ந்த போதகராக இருக்கிறார் சந்தோஷ் கருமாத்ரா.
கேரள கத்தோலிக்க வட்டாரத்தில் அறியப்பட்ட பெருந்தலைகளான கார்டினல் ஜோர்ஜ் அலெஞ்சாரி, மறைமாவட்ட ஆயர் (ஆர்ச் பிஷப்) பேசிலியோ க்ளெமீஸ் மற்றும் திருவனந்தபுரம் ஆர்ச் பிஷப் சூசை பாக்கியம் ஆகியோரின் முன்னிலையில் இந்த தொலைக்காட்சியின் துவக்க நிகழ்ச்சி நடந்துள்ளது.
இதில் அலெஞ்சாரி ஊழல் புகாரில் சிக்கியவர் என்பது குறிப்பிடத்தக்கது.
பிஷப் ஃப்ரான்கோ முலக்கல்

கேரள கத்தோலிக்க திருச்சபையின் இருண்ட பக்கங்களை வெளிச்சத்திற்கு கொண்டு வந்தவர் இழிபுகழ் பெற்ற பிஷப் ஃப்ரான்கோ முலக்கல்.
 பஞ்சாப் மாநிலம் ஜலந்தரின் மறை மாவட்ட ஆயராக இருந்த முலக்கல், கோட்டையத்தைச் சேர்ந்த கன்னியாஸ்திரி ஒருவரை பாலியல் வல்லுறவு செய்த குற்றத்தில் ஈடுபட்டவர்.
 கைது செய்யப்பட்ட முலக்கல் தற்போது பிணையில் விடப்பட்டுள்ளார்.

முலக்கலின் மீது பாலியல் குற்றம் சுமத்திய கன்னியாஸ்திரி, அப்பிரச்சினைக்குப் பின்னர் திருச்சபை பெருச்சாளிகளால் அடைந்த துன்பங்களை பட்டியலிட்டு மாளாது. அவரது குற்றச்சாட்டுகளுக்கு திருச்சபை தொடர்ந்து செவிமடுக்க மறுத்ததோடு அல்லாமல், அவரையே குற்றவாளிபோல் நடத்தியது.

பணி பறிக்கப்படுவது, மிரட்டல் என திருச்சபையின் தாக்குதலுக்கு ஈடு கொடுக்க முடியாத நிலையிலேயே அவர் ஊடகங்களை நாடினார்.
ஊடகங்களின் மூலம் முலக்கல் அம்பலமானதைத் தொடர்ந்து மக்களிடமும் – குறிப்பாக கிறுஸ்தவர்களிடமும் – ஏற்பட்ட எதிர்ப்பைத் தொடர்ந்தே முலக்கலின் மீதான சட்ட நடவடிக்கைகள் முடுக்கி விடப்பட்டு அவர் கைது செய்யப்பட்டார்.

இன்றைக்கும் குற்றம் சாட்டிய கன்னியாஸ்திரியின் ஒழுக்கத்தை கேடாக சித்தரிக்கும் வேலையில் திருச்சபை ஈடுபட்டு வருகின்றது. மறுபுறம், கைது செய்யப்பட்ட முலக்கல் பிணையில் வெளியான போது அவருக்கு உற்சாக வரவேற்பளித்தனர் திருச்சபையினர்.
 என்றாலும், பொதுமக்களிடையே பெயர் நாறிப் போயிருப்பதால் தற்காலிகமாக முலக்கலை “ஆன்மீகப்” பணிகளில் இருந்து விடுவித்திருப்பதாக அறிவித்துள்ளது வாடிகன்.

திருச்சபையின் வெள்ளுடை பொறுக்கிகளின் காமக் களியாட்டங்களை மறைக்கும் திரைச்சீலையாகவே ஷேக்கினா தொலைக்காட்சி துவங்கப்பட்டுள்ளது. என்றாலும், இந்தக் குற்றச்சாட்டை மறுக்கிறார் அதன் நிர்வாக இயக்குனர் கருமாத்ரா.
தங்களுடைய தொலைக்காட்சி மருத்துவர்கள், பொறியாளர்கள், தொழில் முனைவோர் மற்றும் கூலி வேலை செய்யும் சாதாரண மக்களுடைய நிதிப் பங்களிப்புடன்தான் துவங்கப்பட்டுள்ளது என்கிறார் கருமாத்ரா.
கருமாத்ராவின் நைச்சியமான விளக்கத்தை ஷேக்கினா தொலைக்காட்சியின் புரவலர்கள் பட்டியலே அம்பலப்படுத்துகின்றது.

 கத்தோலிக்க திருச்சபையின் மறைமாவட்ட ஆயர்கள் ஆண்ட்ரூ தாழத், ஜோசஃப் கலதிபரம்பில், ரஃபேல் தாட்டில், சாமுவேல் மார் போன்றோர் ஷேக்கினா தொலைக்காட்சியின் புரவலர்களாக அறிவிக்கப்பட்டிருக்கிறார்கள். துவக்க நிகழ்ச்சியிலும் இவர்கள் பங்கேற்றுள்ளனர்.
இதுகுறித்து கேள்வி எழுப்பப்பட்ட போது, அவர்கள் கருத்து ரீதியில் ஆதரவாக இருப்பார்களே ஒழிய தொலைக்காட்சியின் கொள்கை முடிவுகளில் தலையிட மாட்டார்கள் என பதிலளித்துள்ளார் கருமாத்ரா.

 முலக்கல் விவகாரத்தையே உதாரணமாக எடுத்துக் கொண்டு விளக்கிய கருமாத்ரா, தங்கள் தொலைக்காட்சி ஒரு குறிப்பிட்ட சம்பவத்தில் தொடர்புடைய எல்லா தரப்பினரின் குரல்களுக்கு இடமளிக்கும் என்றும் அந்த வகையில் முலக்கல் தனது தரப்பு உண்மைகளை விளக்க வாய்ப்பளித்திருப்போம் எனவும் தெரிவித்துள்ளார்.

இந்த விளக்கத்தை “அப்பன் குதிருக்குள் இல்லை” என்றும் புரிந்து கொள்ளலாம்.

ஷேக்கினா என்பது இறைவியின் ஒளி என்கிறது பண்டைய யூத மதத்தின் ஷப்பாலா மரபு; இவர்களோ திருச்சபை மைனர்களின் களியாட்டங்களுக்கு பிடிக்கும் விளக்கின் ஒளி என்கிறார்கள்.

நமக்கு கடவுளின் மீதெல்லாம் நம்பிக்கை இல்லை – உண்மையில் கடவுள் இருப்பது உண்மையெனில் ஷெஃபீராவின் ஒளி முதலில் இந்த அயோக்கியர்களை அல்லவா பொசுக்கியிருக்க வேண்டும்?
------------------------------------------------------------------------------------------------------------------------------------
 

வியாழன், 18 ஏப்ரல், 2019

சில்லரை வர்த்தகத்தில் அந்நிய முதலீடு--2.

இடதுசாரி அரசியலே தீர்வைத் தரும்
அமைப்புரீதியாக, தொழிலாளர்களும், விவசாயிகளும் திரண்டு இடது சாரி அரசியல் இயக்கத்தை வலுப்படுத்துகிற வழி தவிர வேறு குறுக்கு வழி கிடையாது. இன்று  எல்லா நாட்டு மக்களும் பயனடைய புதிய உலக வர்த்தக உறவை உருவாக்க போராடும் நாடுகளோடு நாமும் இணையாமல் மீட்சி இல்லை. சுருக்கமாக இந்த ஞானம் ஆட்சியாளர்களுக்கு வரவேண்டும். அல்லது இந்த ஞானம் உள்ளவர்களை ஆட்சி யில் அமர்த்த வேண்டும்.
(2) இடதுசாரிகளின் போராட்டமும், சந்திக்கும் பிரச்சனைகளும்
இன்றையத் தேதியில் அந்நிய முதலீடு என்ற பெயரில் அமெரிக்க, ஐரோப்பிய நாடுகள் உருவாக்கும் பொருளாதார நெருக்கடியிலிருந்து உலகையே மீட்கும் ஆற்றல் இந்தியா போன்ற பெரிய நாடுகளுக்குத்தான் உண்டு. ஆனால் இன்றைய இந்திய அரசின் நிலைபாடு உலகை மீட்க கிடைத்த வாய்ப்பை கவனியாமல் நெருக் கடி குழியில் விழவே சில்லரை வர்த்தகத்திலும் அந்நிய முதலீடு என்கிறது.அதற்கு காரணம், நமது நாட்டு பெருமுதலாளி வர்க்கமும், அவர்க ளால் பராமரிக்கப்படும் அமைச்சர்கள் நாடாளு மன்ற உறுப்பினர்களும் அந்நிய முதலீட்டு மோகத்தில் வீழ்ந்து கிடப்பதே
ஒரு காலத்தில் நமது நாட்டு பெரு முத லாளிகள் தங்களது வளர்ச்சிக்கு குந்தகம் விளை வித்த அந்நிய முதலீடுகளை எதிர்த்து  போராடி னார்கள். இன்று கனவு உலகில் சஞ்சரிக்கி றார்கள். சோவியத் யூனியன் மறைவால் மேலை நாட்டு பணத்திமிங்கலங்களோடு  பேரம் பேசும் ஆற்றல் பறி போய்விட்டதை மறந்து விட்டனர். இன்று கூட்டணி வைக்கவும், அவர்களோடு சேர்ந்து உலகளவில் பணத்தை பெருக்க வாய்ப்பு வந்ததாக கனவு காண்கின்றனர். எதையும் பண மாக்கி பெருக்கும் ஆசைதான் தொத்து நோயாக பரவி மேலை நாட்டை உலுக்கி வரும் எதார்த்த நிலையை பார்க்கவே அவர்களுக்கு பிடிக்கவில்லை. வட்டார அரசியல் கட்சிகளும், அதி கார மையத்தை ஆட்டிப்படைக்கும் பெருமுத லாளிகளும் அந்நிய முதலீட்டு வருகையை வரவேற்கிற பொழுது,இடதுசாரி அரசியல் கட்சிகளின் வழி காட்டலில் உழைப்பாளி, விவ சாய மக்களின் ஒருமுகப்படுத்தப்பட்ட   அரசியல் இயக்கமே சரியான தீர்வை காணமுடியும்.
நாடாளுமன்றத்தில் இடதுசாரிகள்
அந்நிய முதலீட்டை அனுமதிக்கக் கூடாது என்று பேசிய கட்சிகள் அனைத்தும் நாடாளு மன்றத்தில் எதிர்த்து வாக்களித்து இருந்தால் 282  வாக்குகள் எதிராக பெற்று அரசின் தீர்மானம் தோற்று இருக்கும். அதேநேரம் அரசிற்கும் ஆபத்து ஏற்பட்டிருக்காது. இடதுசாரிகள் அந்நிய முதலீட்டை அனுமதிக்கும் தீர்மானத்தை தோற்கடிக்கவே வியூகம் வகுத்தனர். அரசை கவிழ்க்கும் நோக்கம் எங்களுக்கில்லை என்பதை துவக்கத்திலேயே அறிவித்து தங்களது முயற்சிக்கு ஆதரவு திரட்டினர். இடதுசாரிகள் மற்ற எதிர்க்கட்சிகளுக்கு வேண்டு கோள்விட்டனர். நாடாளுமன்றத்தில் உங்களது உறுப்பினர் அளிக்கிற வாக்கால் யார் பயனடைவார்கள் என்பதை பரிசீலித்து வாக்களியுங்கள், அந்நிய முதலீடு என்ன நோக்கத்தோடு வருகிறது என் பதையும் கணக்கிலெடுங்கள். பிற நாட்டு அனுபவங்களை கவனியுங்கள் என்று வலுவான அடிப்படைகளை காட்டி நேர்மையாக போராடின. ஆனால் அந்நிய முதலீட்டை எதிர்ப்பதாக  கூறிய கட்சிகள் சில அதற்கு விசுவாசமாக இல்லை..
அதே வேளையில் கட்சிகளின் வர்க்க தன்மை,  அரசியல் தலைவர்களின் சொல்லிலும் செயலிலும் உள்ள முரண்பாடுகள், இடதுசாரிகளின் எதிர் நீச்சல் எல்லாம் ஊடகங்களின்  உதவியால்  மக்கள் காண நேரிட்டுள்ளன. நாடாளுமன்றத்திற்குள் கடந்த 20 வருடங்களாக  உருவாகி வரும் ஒரு அரசியல் அசிங்க கலாசாரத்தை ஊடகங்கள் மூலம் மக்கள் அறிய நேர்ந்துள்ளது.
ஒரு அரசியல் நிபுணர் நாடாளுமன்றத்தில் உறுப்பினர்களின் சொல்லும் செயலும் பல ரகமாக இருந்தது என்பதை பட்டியலிடுகிறார். சில்லரை வர்த்தகத்தில் அந்நிய முதலீட்டை ஆளும் அணிக்குள் இருந்துகொண்டே வாயால் எதிர்ப்பு காட்டுகிற கட்சிகள், எதிர்கட்சிகளில் அரசையும் அந்நிய முதலீட்டையும் எதிர்க்கும் கட்சி, அந்நிய முதலீட்டை ஆதரித்து அரசை எதிர்க்கும் கட்சி , எதிர்ப்பதாக கூறி வாக்களிக்க மறுக்கும் கட்சி என்று பலமுனை தர்பாராக நாடாளுமன்றம் விவாதம் நடந்ததாக குறிப்பிடுகிறார். 38 கட்சிகள் அங்கம் பெறும் நாடாளுமன்றத்தில் சில கட்சிகள் நடத்திய கூத்தே அரசின் சில்லரை வர்த்தகத்தில் அந்நிய முதலீடு திணிப்பு முயற்சிக்கு ஓ போட்டுள்ளது.
543 நாடாளுமன்ற உறுப்பினர்களைக் கொண்ட சபையில் 254 உறுப்பினர்களே அந்நிய முதலீட்டை ஆதரித்து வாக்களித்துள்ளனர். அப்படி வாக்களித்தவர்களிலும்  அந்நிய முதலீட்டை எதிர்க்கிறோம். ஆனால் அரசை காப்பாற்றவே வாக்களிக்கிறோம் என்று சொன்ன கட்சிகளும் உண்டு.மனசாட்சிபடி வாக்களியுங்கள் என்று சொல்லியிருந்தால் அந்நிய முதலீட்டை ஆதரித்து மன்மோகன் சிங்கை தவிர, தேர்தலில் சந்திக்க வேண்டிய நாடாளுமன்ற உறுப்பினர்கள் மக்களுக்கு பயந்து யாரும் வாக்களித்திருக்க மாட்டார்கள்.
பொதுமக்களின் மனத் தவிப்பை புரிந்து கொண்ட மம்தா, ஜெயலலிதா போன்ற முதலமைச்சர்கள் அந்நிய முதலீடா! எங்க ஏரியா உள்ளே விடமாட்டோம் என்கின்றனர். தொழில் வளர்ச்சிக்கு அந்நிய முதலீட்டை நம்பி நிற்கிற  மாநில அரசுகள் அன்றாட செலவிற்கே, மத்திய அரசின் நிதி ஒதுக்கீட்டிற்கும், கடனுக்கும் மனுப் போட்டு காத்திருப்பவர்கள் எப்படி தடுப்பார்கள்(!) . அந்நிய முதலீடு என்ன லாரியிலா வருகிறது மாநில எல்லைக்குள் நுழைவதை தடுக்க என்று நிபுணர்கள் முதலமைச்சர்களின் சந்தை பொருளாதார ஞானம் சூன்யமாக இருப்பதை பார்த்து  புருவத்தை உயர்த்தி அவதூறு வழக்கிற்கு பயந்து ஓரமாக நின்று சிரிக்கின்றனர். அந்நிய முதலீடு மொத்த வர்த்தகத்தை கைப்பற்றுவதின் மூலமும், ஆன்லைன் மூலமும் வருகிறது என்பதை காண இயலாத தமிழக முதலமைச்சரின்  முழக்கம் வீறாப்பல்ல வெறும் பசப்பு என்பது மக்களுக்கு தெரிந்துவிட்டது. வால்மார்ட் நுழைவு மூலம் மொத்த வர்த்தகத்தை அந்நிய முதலீடுக்கு பலியிட அனுமதித்த பிறகு சில்லரை வர்த்தகம் என்னவாகும் என்பதை அம்மாவிற்கு நன்றாகவே தெரியும்.
கரன்சி புழக்கத்தை ஒழுங்கமைக்கும் அதி காரம் யார்கையிலே இருக்கிறதோ அவர்களே அந்நிய முதலீடு நுழைவால் ஏற்படும் பாதிப்பை தடுக்க முடியும். அந்த அதிகாரம்  மத்திய அரசின் கையிலே உள்ளது. மத்திய அரசின் பணப் புழக்க கோட்பாடு மாற்றமே பாதிப்பை தடுக்க முடியும். மாநில அரசுகளின் இந்த வீறாப்பு வெறும் வீண் பேச்சே, மத்திய அரசின்  கொள்கையில் மாற்றம் கொண்டு வருவதற்கும் இடதுசாரிகளோடு  நிற்காமல் இந்த வீறாப்பால்  ஒரு துரும்பை கூட  அசைக்க இயலாது.
இன்று இந்தியாவில் உலக அளவில் மவுசுள்ள பங்குகளை கொண்ட பங்கு நிறுவனங்கள் குறைவு. பொதுத்துறை நிறுவனங்களை பங்கு நிறுவனங்களாக மாற்றினாலும் போதாது. மேலும்  சில சரக்குகளே பியுச்சர்களாக  உள்ளன. எனவே இந்திய பங்கு சந்தையில் புகுவதை விட சரக்கு சந்தையில் புகுவது உடனடியாக சாத்தியம் என்பதால் அந்நிய முதலீடுகளை  சில்லரை வர்த்தகத்தில் புகுத்துவது  என்ற பெயரில் மொத்த வர்த்தகத்தை முழுங்க வருகிறது.
அந்நிய முதலீட்டின் நோக்கம் எதுவாக இருந்தாலென்ன, நமக்கு கொஞ்சம் நல்லது நடந்தால் போதாதா? கொஞசம் பேருக்கு வேலையும், கொஞ்சப்பேர்  பணத்தை குவிக்கவும் புதிய வழிகள் பிறக்கின்றன அது போதாதா? என்று பரவலாக  கருதுவதால் ஏற்படும் ஆபத்தையும் இடதுசாரிகட்சிகள் உணர்ந்திருப்பதால்  பொருளாதாரம் பற்றிய ஞானத்தை உழைப்பாளி மக்களுக்கு உணர்த்த விரிவான பிரச்சார இயக்கத்தை துவங்கியுள்ளனர்.
உலக வர்த்தக அமைப்பின்  தாராளமயம், தனியார்மயம், உலகமயம் (L.P.G) என்ற முழக் கத்தின் உண்மை பொருள் கொள்ளை அடி (Loot) ஏழையாக்கு (Pauperize) டாலரால் ஆட்சி செய் (Gover) என்பதை அந்த பிரச்சாரம் அம்பலப்படுத் தும். அதோடு தீர்வுகள் பற்றி தெளிவான பார்வையும் கொடுப்பதே அந்த பிரச்சாரத்தின் நோக்கமாகும். மூலதனம் என்பது ஒரு சொத்தல்ல. அது ஒரு சமூக சக்தி என்ற விஞ்ஞான பார்வையைப் பெற அதன் வரலாற்றை மக்கள் அறிவது அவசியம். அடுத்த பகுதி அதை விளக்குகிறது. கம்யூனிஸ்ட் அறிக்கையில் உள்ள சில வாக்கியங்கள் மேற்கோளாக காட்டப்பட்டுள்ளன. அது மூலதனத்தின் இயக்கத்தை புரிவதற்கு உதவும்.
(3)
மூலதனத்தின் தோற்றமும் வளர்ச்சியும்
மேலை நாடுகளில் அரிஸ்டாட்டில் காலத்திலிருந்து பொருளாதாரம் என்றால் பொருள் உற்பத்தி, நுகர்வு, பரிவர்த்தனை, விநியோகம் ஆகிய நான்கு கூறுகளை பற்றியதா அல்லது செல்வத்தை திரட்டும் கலையா என்ற சர்ச்சை நடந்து வருகிறது. ஒரு பக்கம் தத்துவ ஞானிகள் இதுவா, அதுவா என்று மோதிக் கொண்டே இருக்கும் பொழுதே 15ம் நூற்றாண்டிற்கு பிறகு வர்த்தகத்தின் மூலம்  தங்கம் வெள்ளியை  திரட்டுவதே செல்வமாகும் என்ற கருத்து (அதாவது பொரு ளாதாரம் என்றால் செல்வம் சேர்க்கும் கலையே) ஐரோப்பிய சமூகத்தை கவ்வியது. பின்னர் அதுவும் மலையேறி, அரசு உத்திரவாதம் செய்யும்  தாள் பணம் கொண்ட சூட் கேஸ்களே செல்வமானது. இன்று அதுவும் போய் எதையும் வங்கிகளிலே கம்ப்யூட்டர்களில் டிஜிட்டல் பணமாக்குவதே செல்வமாக கருதும் கட்டத்திற்கு உலகமே வந்துவிட்டது. இந்த திகில் நிறைந்த வரலாற்றை சுருக்கமாக இங்கே பார்ப்பது அவசியம்.
இன்று சினிமாக்கள், இலக்கியங்கள், விஞ்ஞானம் இவைகளே நாடுகளை இணைக்கும் பாலமாகவும் பயன்படுவதைப் போல, 500 ஆண்டுகளுக்கு முன்பு வரை நாடுகளுக்கிடையே வர்த்தகம் மற்றும் கடல் கடந்த வர்த்தகம் என்பன மக்களிடையே பாலமாக இருந்தன. வர்த்தகம் பண்பாடுகளை இணைத்தது. இருக்கிற பொருளை கொடுத்து இல்லாத பொருளை பெற உதவி யது. அதோடு அறிவு வளர உதவியது., இத்தாலி நாட்டு மார்க்கோ போலோ போன்ற  வணிகர் கள் சீனா, இந்தியா வந்து கொண்டு போன தங்கம், வெள்ளியை விட அறிவு சொத்தே , மேற்கே விஞ்ஞானம் பிறக்க வழி கோலியது. இந்திய பூஜ்ஜியத்தை வைத்து தசாம்ச எண் கணித முறை ஐரோப்பாவிற்கு வர்த்தகர்கள் மூலம் போகவில்லையானால் நவீன வானசாஸ்திரம் பிறந்திருக்காது. நவீன வான சாஸ்திரம் இல்லையானால்  ஐரோப்பியர்களால்  7 கடல்களை இணைக்கும் மார்க்கங்களை கண்டு பிடித்திருக்க முடியாது.  நியூட்டனின் கண்டுபிடிப்பே மலிவான தரமான சரக்குற்பத்தி செய்ய வேண்டும் என்ற வர்த்தகர்களின் உந்துதலே அடிப்படை காரணமாகும். படையெடுத்து கொள்ளை அடிக்காமலே தங்கத்தையும் வெள்ளியையும் திரட்டும் வழிகளை  ஐரோப்பியர்கள் புராதன இந்தியாவிடமிருந்தே கற்றனர். தங்க சுரங்கமே அவ்வளவாக இல்லாத இந்தியாவில் படைபலமும் அவ்வளவாக இல்லாத மன்னர்கள் வசம் தங்கம், வெள்ளி மலை போல் திரள வர்த்தகம் உதவியதை கண்டனர்.  இந்தியா காட்டிய வழியில் சரக்கு உற்பத்தியில் புதுமையைப் புகுத்தி வர்த்தகம் மூலம் தங்கத்தை திரட்டுவதை பிரிட்டன் முதன்மைபடுத்தியது. மற்ற ஐரோப்பிய மன்னர்கள் கடற் கொள்ளையை முதன்மைபடுத்தினர். ஒரு கட்டத்தில் ஐரோப்பியர்களும் விஞ்ஞானத்தை புகுத்தி சரக்குகளை மலிவாக தயாரிக்க போட்டி போட்டனர். பங்கு நிறுவனங்கள் மூலம் தொழில்களை வளர்த்தனர். ஆனால் உழைப்பாளி மக்கள் வறுமையை தழுவ தள்ளப்பட்டனர். இப்பொழுது வர்த்தகம் திசை மாறியது. சுதந்திர வர்த்தக ஒப்பந்த அடிப்படையில் நாடுகளை அடிமைப்படுத்தினர். இரண்டு உலக யுத்தங்களை, நடத்தினர். சமூகத்தில் நவீன பாட்டாளி வர்க்கமாக உழைக்கும் மக்கள் திரண்டதால் பொருளாதாரம் என்றால் பொருள் உற்பத்தி , நுகர்வு, பரிவர்த்தனை, விநியோகம் இவைகளில் எழும் பிரச்சனைகளை தீர்க்கும் விஞ்ஞானம் என்ற கருத்து முன்னுக்கு வந்தது. மூதனத்தை ஒரு சமூக சக்தியாக கருதியே இயக்க வேண்டும் என்ற கருத்து முன்னுக்கு வந்தது. அதுவே விஞ்ஞான சோசலிசம் ஆனது. அதுவே அரசிலதிகாரத்தை மக்கள் கையில் கொடுக்கும் அரசியலானது.
ஐரோப்பிய, அமெரிக்க பாட்டாளி வர்க்க அரசியல் வீச்சு காரணமாக 19ம் நூற்றாண்டி லிருந்து 1970 வரை குறுக்கு வழிகளில் பணம் சம்பாதிப்பதை கிரிமினல் குற்றமாக கருதப்பட்டன. மேலை நாட்டு அகராதியில் பக்கெட் ஷாப், பாயிலர் ரூம் போன்ற சொல் தொடர்கள் பங்குச் சந்தை பரிவர்த்தனைகளில் நேர்மையற்ற  ரகங்களை குறிப்பிடும் சொற்களாகும். அங்கு பங்குசந்தை துவங்கிய காலத்தில் பணக்காரனாக வேண்டும் என்ற ஆசையால் வாயையும், வயிறையும் கட்டி சேமித்த பணத்தைக் பெருக்க சிலர் கையாளும் வழிகளை குறிப்பிடும் சொற்களே இவைகள்.  அவைகள் கிரிமினல் குற்றமாக்கப்பட்டு சட்டங்கள் கொண்டு வரப்பட்டன. பதுக்கல், கள்ள சந்தை, கந்து வட்டி எல்லாம் சிறிய அளவில் நடந்தால் இன்றும் கிரிமினல் குற்றமாக கருதப்படுகிறது.  இன்று  அந்த திருட்டு வழிகள் எல்லாம் வங்கிகள், நிதி நிறுவனங்களின் பணத்தின் மதிப்பிழப்பை தடுக்கும் விஞ்ஞான வழி என்று ஆக்கப்பட்டுவிட்டன. இந்த ஏமாற்றுக்களை பியுச்சர் பேஸ்டு காமெர்ஸ் போர்ட் போலியோ மெனேஜ்மென்ட் ரிஸ்க் அட்ஜஸ் டெட் பெர்பாமென்ஸ், ஹெட்ஜ்பன்டு டிரான் சாக்சன்ஸ் என்று அழைக்கிறார்கள். தினசரி வர்த்தக செய்தியை கேட்கிறவர்களுக்கு இந்த சொற்கள் புரியாமல் போகாது. மற்றவர்களுக்கு இது ஒரு விடுகதையே.
ஜான்கால்ரெயித் போன்ற சில மேலை நாட்டு பொருளாதார நிபுணர்களே பணத்தை பெருக்க இப்படி ஈடுபடுவதை இன்னோசென்ட் பிராடு என்று குறிப்பிடுகிறார்கள். அர்ஜென்டைனா முன்னாள் ஜனாதிபதி லுலா  இந்தியா வந்திருந்த போது மன்மோகன் சிங் அருகிலே இருக்க நிருபர்களிடம் சொன்னது மேலை நாட்டு முதலாளித்துவம், உலகமயம் என்ற பெயரில் உலக நாடுகளின் பொருளாதாரத்தை சூதாட்ட களமாக ஆக்க முயற்சிக்கிறது.
எங்கும் வியாபித்து இருப்பது உழைப்பே!
இன்று முன்பு போல் எந்த நாடும் சரக்கு உற் பத்தியில் தனித்துநிற்க இயலாது. மத்திய ஆசியாவின் பெட்ரோலிய எண்ணெயும், பிற நாடுகளிலிருந்து கச்சாப் பொருளும், உழைப்பு சக்தியும், ஐரோப்பிய விஞ்ஞானமும் இல்லையா னால்  அமெரிக்க பொருளாதார சக்கரம் சுழலாது. பிற நாடுகளிலிருந்து கனிமங்களும் கச்சாப் பொருளும் இல்லையானால் சீனா, ஜப்பான் பொருளாதார சக்கரம் சுழலாது. அது கியுபாவிற்கும், வட கொரியாவிற்கும், இந்தியா விற்கும் ஆப்பிரிக்க நாடுகளுக்கும் பொருந்தும். குண்டூசியிலிருந்து, விண்கலன் வரை சரக்கு உற்பத்தி என்பது உலகத் தொழிலாளர்களின் உழைப்பு சக்தியை இணைப்பதின் மூலமே சாத்யம் என்ற நிலை இன்று உள்ளது. இது தான் எதார்த்தமான உலகமயம். இன்று உலகை இணைப்பது பணமல்ல, இந்த உழைப்பு சக்தியே. உழைப்பு சக்தியை பிரதிபலிக்கிற வரைதான் பணத்திற்கு மதிப்பு. அதிலிருந்து துண்டித்து பெருக்க முயன்றால்  அது மதிப்பிழந்து காணா மல் போய்விடும். அதை மேலை நாட்டு நிபுணர்கள் பபுள்( நீர்குமிழி) என்கின்றனர். இதனால் பல கோடி மக்களின் சேமிப்பு காணாமல் போய் நடுத்தெருவிற்கு வருகின்றனர். எல்லாம் இருந்தும் மேலை நாடுகள் தவிக்க காரணம் பணத்திற்கு மதிப்பு எங்கிருந்து வருகிறது என்பது பற்றிய அறியாமையும். பேராசையும் ஆட்சி அதிகாரத்தை கைப்பற்றி இருப்பதே. உலகம் தழுவிய உழைப் பாளி மக்களின் கூட்டு முயற்சியே  அதாவது அரசியலே முதலாளி வர்க்கத்தின் விறுப்பு வெறுப்பு பேராசை இவைகளுக்கேற்ப தறி கெட்டலையும் மூலதன சக்தியை ஒழுங்கமைக்க முடியும். சமூகத்தில் பெரும்பான்மையினர் உழைப் பால் உயரவே விரும்புகின்றனர், திறமையை காட்டியே புகழ் பெற முயற்சிக்கின்றனர். இவர் கள் அரசியலிலே கை கோர்த்து நின்றால்தான் ஒரு பொன்னுலகை மானுட கூட்டுழைப்பால் உருவாக்க இயலும். அது வரை பூ உலகு உழைப்பாளிகளுக்கு நரகமாகவும், சுரண்டும் கூட்டத் திற்கு சொர்க்கமாகவும் இருக்கும்.  கம்யூனிஸ்ட் கட்சி அறிக்கை (கார்ல்மார்க்ஸ்-ஃபிரெடெரிக் ஏங்கெல்ஸ்)
  1. முதலாளித்துவ வர்க்கத்தின் வளர்ச்சியில் ஒவ்வொரு படிநிலையிலும் அவ்வளர்ச்சிக்கு ஏற்ப அவ்வர்க்கத்தின் அரசியல் முன்னேற்றமும் சேர்ந்தே வந்தது. நிலப்பிரபுத்துவச் சீமான்களின் ஆதிக்கத்தின் கீழ் அது ஓர் ஒடுக்கப்பட்ட வர்க்கமாக இருந்தது. மத்திய காலக் கம்யூனிலோ ஏ7 ஆயுதமேந்திய, சுயாட்சி நடத்தும் சங்கமாக இருந்தது. இங்கே (இத்தாலியிலும் ஜெர்மனி யிலும் காணப்பட்டது போல) சுதந்திரமான நகர்ப்புறக் குடியரசாகவும், அங்கே (ஃபிரான்சில் காணப்பட்டது போல) வரி செலுத்தும் ‘மூன்றாவது வகையின’  34 மக்கள் குழுவாகவும் விளங்கியது. அதன் பின்னர் பட்டறைத் தொழில் மேலோங்கிய காலகட்டத்தில், பிரபுத்துவச் சீமான்களுக்கு எதிரான ஈடுகட்டும் சக்தியாக இருந்துகொண்டு, அரை நிலப்பிரபுத்துவ முடி யாட்சிக்கு அல்லது ஏதேச்சதிகார முடியாட்சிக் குச் சேவை செய்தது. பொதுவாகப் பார்த்தால், உண்மையில் மாபெரும் முடியாட்சிகளின் ஆதாரத் தூணாக விளங்கியது. முடிவாக, முத லாளித்துவ வர்க்கம், நவீனத் தொழில்துறையும் உலகச் சந்தையும் நிறுவப்பட்ட பின்னர், நவீன காலப் பிரதிநிதித்துவ அரசமைப்பில் ஏகபோக அரசியல் ஆதிக்கத்தைத் தனக்கென வென்று கொண்டது. நவீன கால அரசின் நிர்வாக அமைப்பானது, ஒட்டுமொத்த முதலாளித்துவ வர்க்கத்தின் பொது விவகாரங்களை நிர்வகிப்ப தற்கான ஒரு குழுவே அன்றி வேறல்ல.
  2. முதலாளியாக இருப்பதற்கு உற்பத்தியில் தனக்கே உரிய சொந்த அந்தஸ்தை மட்டுமின்றி, ஒரு சமூக அந்தஸ்தையும் பெற்றிருக்க வேண்டும். மூலதனம் என்பது கூட்டுச் செயல்பாட்டின் விளைவுப் பொருள். சமுதாயத்தின் பல உறுப் பினர்களது ஒன்றுபட்ட செயலால் மட்டுமே, இன்னும் சொல்லப் போனால், சமுதாயத்தின் அனைத்து உறுப்பினர்களது ஒன்றுபட்ட செயலால் மட்டுமே மூலதனத்தை இயங்க வைக்க முடியும். ஆக, மூலதனம் என்பது ஒருவரின் தனிப்பட்ட சக்தியல்ல; அது ஒரு சமூக சக்தியாகும்.
எனவே, மூலதனம் பொதுச் சொத்தாக, சமுதாயத்தின் அனைத்து உறுப்பினர்களின் சொத்தாக மாற்றப்படும்போது, அதன்மூலம் தனிநபர் சொத்து சமூகச் சொத்தாக மாற்றப்படவில்லை. சொத்துடைமையின் சமூகத் தன்மை மட்டுமே மாற்றப்படுகிறது. அது தன் வர்க்கத் தன்மையை  இழந்து விடுகிறது.
                                                                                                                                                                                                                                                                                                                                                                                                                       நன்றி:மார்க்சிஸ்ட்.

ஞாயிறு, 14 ஏப்ரல், 2019

சில்லரை வர்த்தகத்தில் அந்நிய முதலீடு-1.

சில்லரை வர்த்தகத்தில் அந்நிய முதலீடு  யாருக்கு பயனளிக்கும் என்ற கேள்விக்கு விடையைத் தேடுமுன் பொதுவாக மேலை நாட்டு அந்நிய முதலீடுகள் பற்றிய ஞானம் தேவைப்படுகிறது. 
இன்றைய உலகில் பொருளாதாரம் என்றால் பணத்தை பெருக்குவது என்ற பார்வை தான் மேலோங்கி உள்ளது. பணத்தை பெருக்க இரண்டு வழிகள் உள்ளன. முதல் வழி  சரக்குகளை உற்பத்தி செய்து  சந்தை மூலம் லாபம் சம்பாதித்து பணத்தை பெருக்குவது. அடுத்த வழி இப்படி சிரமப்படாமலே பணத்தை பெருக்கும் குறுக்கு வழிகளை தேடி உருவாக்குவது.

அமெரிக்க, ஐரோப்பிய தொழில் முனைவர் களும், அவர்கள் காட்டுகிற வழியில் போகிற இதர நாட்டு தொழில் முதலீட்டாளர்களும், இன்று சங்கடமான சரக்கு உற்பத்தியை தொங்கலில் போட்டுவிட்டு, அல்லது பின்னுக்கு தள்ளிவிட்டு, குறுக்கு வழியில் பணம் சம்பாதிக்க வங்கிகளையும், கடன் அமைப்புகளையும் நவீன டிஜிட்டல் தொழில் நுட்பங்களால்  செல் போனுக்குள் திணிக்கும் வேலைகளில் இறங்கிவிட்டனர். 

(அமெரிக்க தொழில் மூலம் வருவாய் கடந்த 10 ஆண்டுகளில் தேச மொத்த வருவாயில் 25 சதமாக இருந்தது12 சதமாக குறைந்து நிதி மூலதன சேவை வருவாய் 10 சதத்திலிருந்து 25 சதமாக உயர்ந்து போனதை நிபுணர்கள் சுட்டிக் காட்டுகின்றனர்)  இதற்கு உலகமயம் என்ற ஒரு நல்ல பெயரையும் வைத்து விட்டனர். 

 கடல் கடந்த வாணிபத்திற்கு வயது 3 ஆயிரம் ஆண்டுகளை தாண்டி நிற்கிறது என்பதை மறந்து உலக வங்கி அதன் முயற்சியால்  வர்த்தகத்தில் உலக உறவு வந்தது போல் இந்த பெயரை சூட்டி விட்டது. வரலாறு அறியாதவர்களுக்கு இது புதுமையே!

இப்படி கூறும் பொழுது இன்று சரக்கு உற்பத்தியும், உலக வர்த்தகமும் உலக நாடுகளின் பெரும்பான்மை மக்கள் பங்கேற்கிற முறையில்  முன்னேறியுள்ளன  என்ற உண்மையை புறக் கணித்துவிட்டதாக கருதிவிடக் கூடாது. உலக வர்த்தகம் வேகப்பட்டுள்ளது. 
எடையிலும் கொள் அளவிலும் பல ஆயிரம் மடங்கு பெருகி யுள்ளது. அன்றைய வர்த்தகம் கடுகு என்றால் இன்றைய வர்த்தகம் இமயமலை. வங்கிகள், கடன் அமைப்புகள் இல்லாமல் இந்த முன் னேற்றத்தை உலக நாடுகள் பெற்று இருக்க முடியாது என்பதையும் மறுக்க இயலாது.
இன்று இந்த அமைப்புகளை  குறுக்கு வழியில் பணம் சம்பாதிக்க உதவிடும் கருவிகளாக்கிவிட்டனர் என்பதே நமது குற்றச்சாட்டு. இன்றைய மேலை நாட்டு பொருளாதார நெருக்கடிக்கு இதுவே காரணமாகும். அதைப்பாராமல் இத்தகைய குறுக்கு வழிகள்தான் பொருளாதார வளர்ச்சிக்கு தூண்டு கோல் என்ற பார்வை மூடநம்பிக்கையாகும்.
 அப்படி நம்புகிறவர்கள் அதிகார மையங்களில் அமரும் பொழுது ஒரு நாடு நெருக்கடியில் தள்ளப்படுகிறது. மக்களை மறந்து டாலரை பெருக்க நினைப்பதாலேயே  நெருக்கடியை  இன்று அமெரிக்கா சந்திப்பதாக அமெரிக்க நிபுணர்களே எழுதிவருவதை நாம் கவனிக்க வேண்டும்.

 இப்பொழுது மேலை நாடுகளிலிருந்து  நுழைகிற எல்லாவகையான அந்நிய முதலீடுகளும்  பணம் தேடிகளாக மாறிவிட்ட மேலை நாட்டு மக்கள் பிரிவுக்கு குறுக்கு வழிகளில் பணத்தை பெருக்கும் வழிகளை அமைத்து கொடுப்பதே பிரதான நோக்கமாகும்.அமெரிக்க, ஐரோப்பிய பணம் தேடிகளுக்கு இருக்கும் அடங்கா பணப்பசிக்கு உணவாக உலகமே தேவைப்படுகிறது.
 வடஅமெரிக்கா, மற்றும் ஐரோப்பிய நாடுகள், ஜப்பான் ஆகிய நாடுகளிலிருந்து வருகிற அந்நிய முதலீடுகள் அனைத்தின் நோக்கமே பணத்தைப் பெறுக்க குறுக்கு வழிகளை உருவாக்குவதே. அங்கிருந்துவரும் அந்நிய முதலீடு புகுந்த நாட்டில் விளைவுகளைப்பற்றி அவர்கள் அக்கறை காட்டுவதில்லை. 
அவர்கள் நாட்டு பணம் தேடிகளின் பணம், பியுச்சர்களிலும், பங்குகளிலும்,  பணவடிவுகளிலும் (ஆங்கிலத்தில் டெரிவேட்டிவ்ஸ்) விளையாடி பெருக்கும் வாய்ப்புகளை உருவாக்குவது, ராணுவ பாதுகாப்பு கொடுப்பது இவைகளே அந்த நாடுகளின் ஆட்சியாளர்களின்  உறுதி, உணர்வு, லட்சியம்  எல்லாம்.
உதாரணமாக விவரம் அறிந்த ஒருவர் அமெ ரிக்காவில் இருந்து கொண்டே இந்திய தங்க சந்தையிலே புகுந்து பல கோடிகளை முடக்கி சில கோடிகளை லாபமாக  தினசரி அறுவடை செய்ய இயலும். அதற்காக அவர் தங்கத்தை இந்தியாவிற்கு கொண்டுவர வேண்டியதில்லை. 
 சொல்லப் போனால் அவர் தங்கத்தை கண்ணால் கூட பார்க்க வேண்டியதில்லை. 
அவருடைய புரோக்கர் அவர் சொல்லும் பொழுது  அவர் அணுப்பிய டாலரை ரூபாயாக மாற்றி இங்கேயே தங்கத்தை வாங்கி அவர் சொல்லும் பொழுது இங்கேயே விற்பார். ரூபாயாக இருக்கும் லாபம் மீண்டும் டாலராக மாற்றப்பட்டு அவர் கணக் கிலே ஏறிவிடும்.பியுச்சர்களையும், பங்குகளையும் இதே போல் வாங்கி விற்று லாபத்தை குவிக்க முடியும். 

ஆனால் எப்பொழுது வாங்கவேண்டும், எப்பொழுது விற்க வேண்டும் என்ற மர்மத்தை தாண்ட துணிய வேண்டும். இப்படி சூதாடக் கூடிய முதலீட்டாளர்கள் அமெரிக்க மக்கள் தொகையில் 4ல் ஒருவர் (சுமார் 8 கோடி மக்கள்) என்று ஒரு புள்ளி விவரம் கூறுகிறது.
சில்லரை வர்த்தகத்தில் அந்நியமுதலீடு என் பதின் உள் பொருள் மக்கள் பயன்படுத்தும் பொருட்களை பியுச்சர்மயமாக்கி பணம் தேடிகள் பணப்பெருக்க சூதாட்டத்திற்கு கொடுத்து விடுவது என்பதே.
 சுருக்கமாக சொன்னால் சில்லரை வர்த்தகத்தில் அந்நிய முதலீடு என்றால் மொத்த வர்த்தகத்தையும்  முழுங்குவது என்பதே. 
இப்பொழுது பெட்ரோலுக்கு நேரும் கதி  கத்திரிக்காய் முதல் கடுகு வரை எல்லா பொருள் களுக்கும் வரும் என்று பொருள்.

அந்நிய முதலீடு ஜிபூம்பாவா? அல்ல!
மாபெரும் ஊடகங்களிலும் மாபெரும் சர்ச்சைகள் நடக்கின்றன. பொதுவாக ஊடக சர்ச்சைகள் உண்மையை தேட மக்களுக்கு உதவ வேண்டும். ஆனால் இந்த சர்ச்சைகள் மக்களை குழப்புகிறது. 
ஒரு பக்கம் சில்லரை வர்த்தகர் களுக்கு அந்நிய முதலீட்டால் வரும் ஆபத்துக் கள் பட்டியலிடப்படுகின்றன. ஏதோ அவர் களுக்கு மட்டும் பாதிப்பு வருவது போல் பய முறுத்துகின்றனர். 
மறு பக்கம் அதனால் வரும் நன்மைகள் பட்டியலிடப்படுகின்றன. விவசாயி தனது பொருளுக்கு விலை நிர்ணயிக்கும் உரிமை கிடைப்பதால் கட்டுப்படியான விலை கிடைக்கு மென விளம்பரம் செய்கின்றனர். அவனது விவசாய இடு பொருள்களின் விலைகள் என்ன வாகும் என்பதை மறைக்கின்றனர்.
இதில் மத்திய அரசின் அமைச்சர்களும் விடு கிற பீலாவிற்கு எல்லையே இல்லை.

 அந்நிய முதலீடு ஒரு ஜீபூம்பா என்கின்றனர், அது கண் இமைக்குமுன் கிராமங்களை இணைக்கும் சாலை களை கட்டிவிடும், எல்லா கிராமங்களிலும் விவசாயப் பொருட்கள் கெடாமல் இருக்க குளிர் பதன ஏற்பாடுகள் அமைத்து கொடுத்துவிடும். அதிவேக குளிர்பதன லாரிகள், அதிவேக குளிர் பதன கூட்ஸ் ரயில்கள் சர்வதேச சந்தையில் நமது காய்கறிகளும் பூக்களும் மலிவு விலையில் கிடைத்திட  ஜம்போ விமான சர்வீஸ் எல்லாவற்றையும் வேகமாக கட்டி கொடுத்துவிடும் என் றெல்லாம் சரடு விடுகின்றனர்.
சென்ற ஆண்டில் அமெரிக்க இந்திய முதலீட்டாளர்கள் அமைப் பில் கலந்து கொண்டு பேசிய அமெரிக்க முத லாளிகள் உங்க நாட்டிலே மின்சாரம் முதல் போக்குவரத்து வரை மோசமாக இருப்பதை சரி செய்யுங்கள்  நாங்கள் வருகிறோம் என்று சொன்னவர்கள்  இன்று சில்லரை வர்த்தகத்தில் நுழைவோம் என்று சொல்வதின் மர்மமென்ன? 
அதைப் புரியும் ஞானம், நம் நாட்டு இன்றைய ஆட்சியாளர்களுக்கோ, டாலர் வெறி கொண்ட லையும் முதலாளிகளுக்கும் கிடையாது.

 மேலை நாட்டு சந்தை நிலவர தகவல்களை ஆழ்ந்து பரிசீலித்தால் மேலை நாடுகளின் பணவடிவில் இருக்கும் சேமிப்புகள் மதிப்பிழப்பதால் ஏற்படும் பண புழக்க நெருக்கடியை சமாளிக்கவே அது வருகிறது  என்ற உண்மை புலப்படும்.
ஏற்கனவே இந்தியாவில் அந்நியமுதலீடு எதில் விழுந்திருக்கிறது, எவ்வளவு வந்திருக்கிறது என் பதை கவனித்தாலே போதும் 2012ம் ஆண்டு நிலவரப்படி அந்நிய முதலீடு 1.796 லட்சம் கோடி வந்துள்ளது . இது முழுவதும் பங்குகள் கடன் பத்திர முதலீடுகளே தவிர அடிப்படைவசதி களை கட்ட வரவில்லை. (ஆதாரம்: பிரண்ட் லைன் ஜனவரி11,2013)
இவ்வாறு முதலீடு செய்பவருக்கு பணப் பெருக்க வழிகளை புதிது புதிதாக உருவாக்காமல் இருந்தால். அவரது பணவடிவில் இருக்கும் சேமிப்பு  மதிப்பிழந்துவிடும் என்று மேற்கத்திய பொருளாதார நிபுணர்கள் வாதிடுகின்றனர். 
ஆனால், அந்த சேமிப்புகள் உலகை மேய போவ தால் அங்கு  வேலையில்லா திண்டாட்டத்தை யும், சம்பளம் வெட்டையும் கொண்டுவருவதை அவர்கள் கணக்கிலே கொள்வதில்லை.

இப்பொழுது நடப்பதென்ன?

உலக நாடுகளின் பொருளாதார ஆற்றலை பணத்தைப் பெருக்கும் குறுக்கு வழிக்கு இழுத்து விடும் நோக்கோடு இன்று அமெரிக்காவின் தலைமையில்  உலக வர்த்தக அமைப்பு செயல் பட்டு வருகிறது. 
இதன் வேலை உலக நாடுகளை எதையும் பணமாக்கும் முறைக்கு  பக்குவப் படுத்துவதுதான். எல்லா தொழில்களையும், பங்கு நிறுவனங்களாக ஆக்க அது வற்புறுத்து கிறது. தனி நபருக்கோ அரசிற்கோ அந்த நிறு வனத்தின் மீது உரிமை கொண்டாட  இடமளிக்க கூடாது என்கிறது.  
எல்லா சரக்குகளும், சேவை களும் பியுச்சர்களாக  ஆக்கப்பட வேண்டும் என்கிறது.

 தனி நபர்கள் பங்குகளையும், பியுச்சர் களையும் சுதந்திரமாக வாங்கி விற்று லாபம் சம்பாதிக்கும் உரிமை அடிப்படை உரிமையாக ஆக்கப்படவேண்டும் என்கிறது.
 தங்களது சேமிப்பை பெருக்க விவரம் தெரியாதவர்கள் இதற்கென சந்தை நிபுணர்கள் நடத்தும் ஹெட்ஜ் பன்ட், மியூச்சுவல்பன்ட் உதவியை பெற்று காலை ஆட்டிக் கொண்டே சம்பாதிக்க சட்டம் இருக்க வேண்டும். இதற்கு பெயர்தான் தாராள மய தனியார் மயமாக்கலாகும்.
இத்தகைய தாராள தனியார்மய இலக்கோடு மேலை நாடுகளின் வங்கிகள் நிதி நிறுவனங்கள் உலக வர்த்தக அமைப்பு ஒப்பந்தம் மூலம்  பல நாடுகளில் புகுந்தன. உலக வங்கி தரும் புள்ளி விபரப்படி 1980ல் 52 நாடுகளில் தான் பங்குச் சந்தை  செயல்பட்டன. 
இன்று 142 நாடுகளில் பங்குச் சந்தைகள் செயல்படுகின்றன. இன்றைய தேதியில் உலகளவில் பங்குகளிலும் சரக்கு களிலும் அந்நிய நாடுகளில் மூதலீடு செய்வதில் முதல் இடத்தில் இருப்பது அமெரிக்கா.

 பங்கு களிலும், இதர பணவடிவுகளிலும் வெளி நாடு களில் அமெரிக்கர்களின் முதலீடு 14 டிரில்லி யன்(14 000.000,000,000,) டாலரை தாண்டிவிட்டதாக ஒரு புள்ளிவிவரம் கூறுகிறது. வெளிநாடுகளின் முதலீடுகளை கணக்கிட்டால் 90 சதம் அமெரிக்கா, ஐரோப்பியநாடுகள் ஜப்பான் நாடுகளிலிருந்து வருபவைகளே. 
இந்திய பங்குச் சந்தையில் புரளும் பங்குகளின் எண்ணிக்கை போதாத காரணத்தால் சரக்குகளையும் பியுச்சர் களாக ஆக்கிட வற்புறுத்தி வருகிறது.
தாதுக்களும், இயற்கை வளங்களும் நிறைந்த இந்தியாவையும் இந்த வட்டத்திற்குள் தள்ளி விட்டால் டாலர்  முதலீட்டாளர்களுக்கு  வாய்ப்புகள் பல மடங்கு பெருகும். 
இவைகள் எல்லாம்  ஓரே நாளில் இங்கு வந்து விடாது  என்பதை அவர்கள் அறிவர். முதலில் வேலை தேடும் உணர்வை படுக்கவைத்து, படுத்துக்கிடக்கிற பணம் தேடி உணர்வை மக்களுக்கு அணிச்சை செயலாக ஆக்க வேண்டும். அடுத்து இதற்கான தொடர்பு கொள்ளும் கருவிகள், வங்கி அமைப்புகள், விலை நிலவரங்கள், பங்குச் சந்தை நிலவரங்கள் பற்றிய ஆரூடங்கள் இவைகளை பரப்புகிற நிபுணர்கள் மற்றும் அமைப்புகள் வளர்க்கப்பட வேண்டும். இதற்கென படிப்பு முறைகள் புகுத்திட வேண்டும்,.
 பவுதீக விஞ்ஞானத்தின் அணுவிற்குள் இருக்கும் இயக்கங்களை கணக்கிடும் குவாண்டம் விதிகளை சந்தைக்கும் பிரயோகித்து ஊசலாடுகிற பங்குகள் விலை, சரக்குகளின் விலைகள் பற்றி  ஆரூடம் சொல்லும் முறைக்கு  விஞ்ஞான சாயம் பூசி மக்களை மயக்க வேண்டும்.
பதஞ்சலி


எதையும் பணமாக்கலாம் யார் வேண்டுமானாலும் பணக்காரனாக ஆகலாம் என்ற மாயை பரவ ஊடகங்களை பயன்படுத்த வேண்டும். தள்ளு வண்டிக்காரர் தனவந்தரானார், உனது முட்டாள்தனமே உனது வறுமைக்கு காரணம் என்றெல்லாம் ஊடகங்கள் ஓதிக்கொண்டே இருக்க வேண்டும். 
பணக்காரர்களின் பட்டியலை வெளியிட்டு, ஆசையை வளர்க்க வேண்டும், வரி ஏய்ப்புக்களையும், இதர தில்லுமுல்லுகளையும் அரசை இதமாக அணுகவைக்கவும், லஞ்சமும் ஊழலும் வேலைகள் சுழுவாக நடக்க உதவுகிறது என்ற மயக்கத்தை புலம்பிக் கொண்டே ஏற்க வைக்கவும் அது தான் மானுட இயல்பு என உள வியல் ஆய்வு  கூறுவதாக  கூலி நிபுணர்களைக் கொண்டு செய்தி பரப்ப வேண்டும். 

 எதையும் பணமாக்கலாம் என்பதை காட்ட வேண்டும். உதாரணமாக கடந்த காலங்களில் ஆடம்பர திருமணங்கள் என்றால் பொருட் செலவு. ஆனால் இன்று மகிழ்ச்சியூட்டும் தொழிலாக்கப் பட்டு பணம் சம்பாதிக்கும் ஏற்பாடாக தொலைக்காட்சி நிறுவனங்கள் மாற்றிவிட்டன.
 ஐஸ்வர்ய ராய், சிநேகா, திருமண சடங்குகள் நல்ல விலை போனதாக கிசு கிசுக்கள் உள்ளன.
 மூளையை கசக்காமலே, உடலை வருத்தாமலே, அதிருஷ்டம் ஒருவனை பணக்காரனாக்கிவிடும் என்ற நம்பிக்கையை, வதந்திகளாக பரவ விட்டுவிட வேண்டும்.

மத நம்பிக்கைகளை வலுப்படுத்தும் கருத்துக்களை தத்துவம் என்ற பெயரில் மக்கள் தலையில் கட்ட வேண்டும். உழைப்பே  மானுடத்தின் உயிர் நாடி என்ற சோசலிச லட்சியத்தை இழிவுபடுத் திக் கொண்டே இருக்க வேண்டும். 
வரலாற்றை சிதைத்து சோசலிசம் என்றால் ஒரு பயங்கரம் என்று பயமுறுத்திக்கொணடே இருக்க வேண் டும். வரலாற்றையும், வர்க்க போராட்ட அரசி யலையும் மறைத்து எல்லா மற்றங்களும், டார் வின் இயற்கையின் தேர்வு விதிப்படி நடப்பதாக விஞ்ஞான கண்டுபிடிப்புக்களைக் கொண்டு விளக்கம் கொடுக்க வேண்டும். மொத்தத்தில் தனி மனிதனின் மூளையில் அழுக்குகளை சேர்க்க வேண்டும்.பாதுகாப்பற்ற உணர்வை அவனது உந்து சக்தியாக ஆக்க வேண்டும்.

மேலை நாட்டு முதலாளித்துவம் ஊடகங்கள் வாயிலாக இத்தகைய நடவடிக்கைகளில் திட்ட மிட்டே ஈடுபடுகிறது.
 தூதுவர்கள் மூலம், ஆட்சி யாளர்களையும், அரசியல் தலைவர்களையும், பெருமுதலாளிகளையும்,அதிகாரிகளையும் அணுகி தங்கள் பக்கம் இழுத்துக் கொள்கிறது. இதில் பாலியல் அடிமைகளின் பங்கு அளப் பரியது.சமீபத்தில் வால்மார்ட் என்ற நிறுவனம் மெக்சிகோவிலும், இந்தியாவிலும் ஆதரவு திரட்டிய முறைகள் பற்றி பரபரப்பாக பேசப்பட்டது எதெற்கென்றால்  பிசினசில் இதெல் லாம் சகஜம் என்ற உணர்வை காலப்போக்கில் உருவாக்கும் திட்டமே.
 இன்று உலக நாடுகளில் பெரும்பகுதி அரசு கள் உலக வங்கியின் பிடியில் மயங்கி கிடக்கின்றன. இதனால் அமெரிக்க ஜனாதிபதி தயவில் பல சிறிய நாடுகளில் சர்வாதிகார ஆட்சியும்,இந்தியா போன்ற பெரிய நாடுகளில் நாடாளுமன்றத்தை நடைப்பிணமாக்கும் சுரண்டும் வர்க்க ஆட்சியும் நடப்பதை காணலாம். 
ஆனால் அவர்கள் என்ன தான் முயற்சித்தாலும் அதன் விளைவு தற்காலிக மானதே என்பதை இன்றையச் செய்திகள் உறுதி செய்கின்றன.


இந்த நாடுகளில் மக்களின் போராட்ட அலைகள் அடிப்பதை காணலாம் பொருளாதார வளர்ச்சி மக்களுக்கு பயன்படாமல் போவதால் வர்க்க போராட்டங்கள் எல்லா நாடுகளிலும் தீவிரமடைவதை காணலாம்.
உலக வங்கியை நம்பி மோசம் போகும் நாடுகளில் இந்தியா, மெக்சிகோ முதல் இரண்டு இடத்தில் இருக்கிறது. மறுபக்கம் உலக வங்கியின் சொல் பேச்சை கேட்டு  மக்களை தவிக்கவைத்த அரசுகள் இருந்த அர்ஜென்டைனா, பிரேசில், வெனிசுலா போன்ற நாடுகளில் மக்கள் மேலை நாட்டு அந்நிய முதலீடெனும் காட்டு வெள்ளத்தை சமாளித்து உலக வர்த்தக உறவை மக்களுக்கு சாதகமாக பயன்படுத்தும் அரசியல் தலைமையை உருவாக்கிவிட்டதையும் காணலாம். 
அந்த நாடுகள் மீது நாட்டோ ராணுவம் தாக்கு தல் தொடுக்க தயாராய் வருவதையும் பத்திரிகை கள் தெரிவிக்கினறன. 
அதேநேரம் யுத்தத்தில் நேரடியாக ஈடுபடுவது லாபகரமான சேவை தொழில் அல்ல என்ற சங்கடமும் அவர்களுக்கு இருப்பது தெரிகிறது. எனவே இந்தியா- பாகிஸ் தான், இந்தியா – சீனா, இஸ்ரேல்- அரபு நாடுகள், கொலம்பியா – வெனிசுலா, மோதலுக்கும் ஆப்பிரிக்க நாடுகளில் உள்நாட்டு கலவரத்திற்கு உதவுவது ராணுவசேவை லாபகரமான தெழிலாகிவிடும் என்பதால் அந்த முயற்சியிலும் ஈடுபடுவதை உலக அரசியலை கவனிப்பவர்களால் உணர முடியும். 
அதே வேளையில் அமெரிக்கா உட்பட உலகெங்கிலும் உள்ள இடதுசாரிகள் மூலதனம் எனும் சமூக சக்தியை ஒழுங்கமைக்கவும், புதிய உலக வர்த்தக உறவை உருவாக்கவும் போராடி வருகிறார்கள் .அவர் களது முயற்சிகளோடு நமது முயற்சிகளையும் இணைப்பதன் மூலமே வெற்றி அடைய முடியும்.
                                                                                                               -வரும்.
நன்றி:மார்க்சிஸ்ட்.
 

வியாழன், 28 பிப்ரவரி, 2019

அர்னாப் – மாலனை பாகிஸ்தானுடன் போருக்கு அனுப்புங்கள் !

புல்வாமா தாக்குதல் நடந்த பிறகு அரசும், ராணுவமும் அடையும் பதட்டத்தை விட, இந்துத்துவ கும்பலுக்கு அடியாள் வேலை பார்க்கும் பத்திரிகையாளர்களின் கூச்சல், பதட்டம் அதிகமாக இருக்கிறது. தாக்குதல் நடந்த அன்று அர்னாப் கோஸ்வாமி பாகிஸ்தானுடன் போரிட்டே ஆக வேண்டும் என குதித்தார்.
அர்னாப்பின் கதறலை மெல்லிய தொனியில் பேசும் நம்மூர் பத்திரிகையாளர் மாலன், இதுதான் சந்தர்ப்பம் பாகிஸ்தானை முற்றாக குண்டு போட்டு அழிக்க வேண்டும் என யோசனை சொன்னார்.
இரு தினங்களுக்கு முன் பாகிஸ்தான் ஆக்கிரமித்துள்ள காஷ்மீரின் தீவிரவாத முகாம்களை அழித்ததாக  இந்தியா சொன்னபோது, மாலனுக்குள் இருந்த முழு சங்கியும் வெளிப்படுகிறார். அவர் எழுதிய முகநூல் பதிவில்,
“ஓடவும் முடியாது, ஒளியவும் முடியாது! இன்று அதிகாலை நடந்த அதிரடித் தாக்குதலின் சிறப்பு என்ன?

போர் வியூகம் வகுக்கும் மாலன்…
புல்வாமாவில் தாக்குதல் நடத்திய உடனேயே பதிலடி இருக்கும் என்று ஜெய் ஷே முகமது எதிர்பார்ததது. அதனால் கட்டுப்பாட்டு எல்லைக்கு அருகில் இருந்த முகாம்களை 100 கிலோமீட்டர் உள்ளே, அதாவது பாகிஸ்தான் எல்லைக்குள் மாற்றியது. அது பத்திரமான மலைப்பகுதி. எவ்வளவு பத்திரமாணது என்றால் அமெரிக்காவிற்கு டிமிக்கி கொடுத்துக் கொண்டு ஒசாமா பின் லேடன் ஒளிந்திருந்த இடம் அது. அது 5 நட்சத்திர ஓட்டலின் வசதிகளோடு கூடிய இடம்.
தீவிரவாதிகள் அந்த இடத்தை தேர்ந்தெடுத்ததற்குக் காரணம் அது பாகிஸ்தானில் இருக்கிறது. இந்தியா எல்லை தாண்டி வந்து தாக்காது என்று நினைத்தது. ஏனென்றால் 1971 -க்குப் பிறகு, 48 வருடங்களாக இந்தியா எல்லை தாண்டி சென்று தாக்கியதில்லை.
அதன் கணக்குகள் பொய்த்தன. அந்தக் காலங்கள் மலையேறிவிட்டன என்று அதற்குத் தெரியாது. இந்தியா தீவிரவாதிகள் பின்வாங்கக் காத்திருந்தது. அதே நேரம் வேறு பல வழிகளில் அழுத்தம் கொடுத்து வந்தது. தீவிரவாதிகள் இடம் மாறியதும் துணிந்து எல்லை தாண்டிப் போய் போட்டுத் தள்ளியது. இறந்த தீவிரவாதிகளின் எண்ணிக்கை 400! (375 பயிற்சியாளர்கள்+25 பயிற்சி அளிப்பவர்கள்.)
40 -க்கு பதில் 400! இதுதான்(டா) இந்தியா!” என்கிறார்.

*****

ந்தியாவின் தாக்குதலில் எத்தனை பேர் பலியானார்கள் என்பது குறித்து இந்திய அரசே இதுவரை உறுதியான எந்தத் தகவலையும் கூறவில்லை. வெடி சத்தம் கேட்டது உண்மைதான், ஒரே ஒருவருக்கு, அதுவும் அந்த மலைப் பகுதியில் வசிக்கும் ஒருவருக்கு காயம் என்பதாக பிபிசி ஆதாரத்தோடு செய்தி வெளியிட்டது.  உண்மை இப்படியிருக்க, அக்மார்க் சங்கிபோல, மாலன் “40 -க்கு பதில் 400” என அவிழ்த்து விடுகிறார்.
புதன்கிழமை நடந்த தாக்குதலின் போது பாகிஸ்தான் வசம் அபிநந்தன் என்ற வீரர் சிக்கினார். அவரை மீட்டுக் கொண்டு வர வேண்டும் என சமூக ஊடகங்களில் இந்திய மக்களும் பாகிஸ்தானியர்களும்கூட வலியுறுத்திய நிலையில், கீ போர்டில் போர் புரியும் மாலன், “சிராய்ப்புக் கூட இல்லாமல் சண்டையில் ஜெயித்த ஹீரோக்கள் சினிமாவில் கூட இல்லை!” என அஞ்சா நெஞ்சனாக எழுதுகிறார்.

நல்லா கூவுற தம்பி….
மாலனைப் போல டிவி ஸ்டியோவில் உட்கார்ந்துகொண்டு  ‘போர் போர்’ என கத்திக்கொண்டிருக்கிறார் அர்னாப் கோஸ்வாமி. போர் வேண்டாம் என முழக்கங்கள் எழ ஆரம்பித்த நிலையில், போருக்கு போயாக வேண்டும் என அடம்பிடிக்கும் அர்னாபை தயவு செய்து பாகிஸ்தானுக்கு அனுப்பி வையுங்கள் என ட்விட்டரில் பலர் கோரிக்கை வைக்க ஆரம்பித்துவிட்டனர்.
“அன்புள்ள பாகிஸ்தானியர்களே இங்குள்ள அர்னாப் கோஸ்வாமியை அழைத்துக்கொண்டு, அபிநந்தனை திருப்பி அனுப்பி விடும்பம்படி பணிவுடன் கேட்டுக்கொள்கிறேன்” என்கிறார் ரவிச்சந்திரன்.
முன்னாள் இராணுவ வீரரான சாவூர், “அபிநந்தனை மீட்க அர்னாப், கவுரவ் சாவந்த், நாவிகா குமார், ராகுல் கன்வால், ராகுல் சிவசங்கர் போன்றோரை அனுப்பி வைக்கும்படி கேட்டுக்கொள்கிறேன்” என்கிறார்.
அதுபோல, மாலனையும் அனுப்பி வைக்க வேண்டும் என தமிழ் முகநூல் பதிவர்கள் பலர் விரும்புகிறார்.
“மாலன் போன்ற போர் விரும்பிகள் தங்கள் குடும்பத்துடன் காஷ்மீர் சென்று எதிரிகளை சுட்டு வீழ்த்தி தங்கள் வீரத்தை நிரூபிக்க வேண்டும். இதுதான் பொருத்தமான நேரம். மாலன், கூச்சப்பட்டு அமைதியாக இருந்துவிடுவார் என்பதால் நாம் அவரை போர் முனைக்கு செல்வதற்கு உற்சாகப்படுத்த வேண்டும். தேசமே பதற்றத்தில் இருக்கும்போது தேசபக்தாளுக்கு ஃபேஸ்புக்கில் என்ன வேலை?” என்கிறார் பாரதி தம்பி.

***

“நமது ராணுவத்தில் நேரடியாக யுத்தத்தில் இறங்கும் சிப்பாய்கள் அனேகமாக பஞ்சமர்களும் சூத்திரர்களுமே. 10% இடஒதுக்கீட்டின்படி உயர்சாதியினரையும் அங்கே பணியமர்த்த வேண்டும். மாமிசம் சாப்பிடுகிறவர்களுக்குதான் முரட்டு குணம் வரும் என்று சங்கிகள் கூறுவதால் அவர்களும் அதை சாப்பிட வேண்டும். இந்த ஏற்பாட்டிற்கு பிறகு போருக்கு போனால் வெற்றி நிச்சயம். சரிதானே மாலன்..?” எனக் கேட்கிறார் பேராசிரியர் அருணன்.

***

இந்தியாவின் தாக்குதல் குறித்து தெலுங்கு செய்தி தொலைக்காட்சி நிகழ்ச்சி தொகுப்பாளர் ராணுவ உடையணிந்து செய்தியை வழங்கினார். அதைக் குறிப்பிட்டு, “இதுபோல இனி, திரு மாலன் நாரயணன் தொலைகாட்சிவிவாதங்களுக்கு மில்ட்ரி ட்ரஸில் வரவேண்டும். அதே வேகத்தோடு எல்லைக்குப் போய் பாகிஸ்தான் மண்ணில் குதித்து… படபடவென்று தன்னைத் தானே சுட்டுக் கொள்ள வேண்டும்…” என்கிறார் இரவிக்குமார்.

***

“இந்திய ராணுவ தளபதி அவர்களுக்கு..
தமிழ்நாட்டில் மாலன் என்றொரு ஸ்பார்ட்டன் வீரர் ஒருவர் போர் புரிய துடியாய் துடித்துக் கொண்டிருக்கிறார்.. தயவு செய்து வந்து அள்ளிட்டு போகவும்.. ” என்கிறார் கார்ட்டூனிஸ்ட் பாலா.

***

“போர் வேண்டும்” என்று தினம் தினம் சமூக வளைதளங்களில் பரப்பிக் கொண்டிருப்பவர்கள் முதலில் தங்கள் குடும்பத்துடன் ஜம்மு காஷ்மீர் எல்லைக்கு சென்று குடியேற வேண்டும்.
மாலன், மாரிதாஸ் போன்ற பிஜேபி அயோக்கியர்கள் தங்கள் சுய லாபத்திற்காக, பாதுகாப்பான இடங்களில் அமர்ந்து கொண்டு போர் வேண்டும் என்று மக்களின் உணர்ச்சிகளை தூண்டி வருகிறார்கள்…” என காட்டமாகிறார் சந்திரசேகர்.

***

“மாலன் என்ற ஆளுங்கட்சி ஜால்ரா பத்திரிகையாளர் அவருடைய 300 தீவிரவாதிகள் கதையை எந்த ஆதாரத்தின் அடிப்படையில் எழுதினார் என்று விளக்கம் கொடுப்பாரா? கொல்லப்பட்ட தீவிரவாதிகள் பற்றிய விவரங்களை உளவுத்துறை தெரிவிக்குமா? இந்த தாக்குதல் குறித்து இந்திய விமான படை நேரடியாக அறிக்கை அளிப்பார்களா?
ராணுவ தாக்குதல் குறித்து சந்தேகம் கொள்வதற்கு மிகவும் கஷ்டமாக தான் இருக்கிறது. ஆனால் பிஜேபி-யினர் அள்ளி விடும் கதைகளால் ராணுவத்தின் பொறுப்பு கேள்விக்குரிய விஷயமாக ஆக்கப்பட்டுள்ளது தான் இதற்கு காரணம்.” என்கிறார் அரசியல் நையாண்டி.

***

“கத்தியின்றி இரத்தமின்றி யுத்தமொன்று வருகுது!
சத்தியத்தின் நித்தியத்தை நம்பும் யாரும் சேருவீர்!
– என்ற நாமக்கல் கவிஞர் வழியிலேயே மாலனுக்குப் பதில் சொல்லத் தொடங்குகிறேன்.
போர் என்றால் நடுங்குகுறார்கள் புறநானுற்றின் புலிப் போத்துகள் என்று மாலன் பதிவிட்டத்தை நான் காண நேர்ந்தது. மாலன் வரிகளையும் என்னால் விளங்கிக் கொள்ள முடிகிறது. பறநானூற்றின் புலிப் போத்துகள் என்று தமிழர்களை தான் குறிப்பிடுகிறார் என்பதை என்னால் புரிந்துக் கொள்ள முடிகிறது. அவ்வரியால் தான் தமிழ்ப் பேசினாலும் தான் ஒரு தமிழினில்லை என்று தன்னுடைய அடையாளத்தையும் அதே ஒற்றை வரியில் உறுதிப் படுத்தியிருக்கிறார். புலிப் போத்துகள் என்ற சொல்லை விடுதலைப் புலிகளை சிறுமைப் படுத்தவும் பயன்படுத்திக் கொள்வதை நான் உணர்கிறேன்.
அதிகாரத் திணிப்பை எதிர்த்து போராடிய புறநானூற்றின் புலிப் போத்துகள் தன் இனத்தின் ஒரு பகுதியை இழந்தே இருக்கிறோம். போரின் வலியை நாங்கள் உணர்ந்தே இருக்கிறோம். அதன் பாதிப்புகளையும் நிகழ் காலத்தில் கண்டிருக்கிறோம்.
இந்நாட்டிலும் ஆரிய திராவிடப் போரை தொடர்ந்து நடத்திக் கொண்டே இருக்கிறோம். நாங்கள் கருத்தியல் போர் நடத்திக் கொண்டிருக்க, கல்வி கற்பதாலேயே எதிர்த்துப் பேசுகிறார்கள் என்றறிந்து படுகொலைகளை கல்வி நிறுவனங்களின் மூலமாகவும், தகுதித் தேர்வு என்ற பெயர் மூலமாகவும் நிகழ்த்திக் கொண்டு இருக்கிறீர்கள் மாலன்.
உண்மையில் உங்கள் நெஞ்சில் உரமிருந்தால் அபிநந்தனின் குடும்பத்தைப் பார்த்து விட்டு வாருங்கள். போரினால் கைக்கால் இழந்த இராணுவ வீரர்களையும் அவர்கள் குடும்பத்தின் நிலையையும் பார்த்து விட்டு வருங்கள். போரினால் உயிரிழந்த இராணுவ வீரர்களின் குடும்பங்களையும் சந்தித்து விட்டு வாருங்கள்.
இதற்கு மேலும் இறுதியாக ஒரு மாத காலம் காஷ்மீரில் இருக்கும் இசுலாமியர்களின் வீடுகளில் ஒரு மாதம் காலம் இருந்து விட்டு வாருங்கள்.
பின்னர் உங்கள் பிள்ளைகளையும், பேரக் குழந்தைகளையும் போருக்கு அனுப்பி வைத்துவிட்டு வாருங்கள்.
போலி தேசப் பக்தியால் ஓட்டுப் பொறுக்காதீர்கள் மாலன் அவர்களே!”  முரளிகிருட்டிணன் சின்னதுரையின் பதிவு இது.

***

“எல்லையில் காவல் காக்க மாலன் செல்ல இருப்பதாக செய்தி வருகிறது. உண்மையா?” எனக் கேட்கிறார் யோ. திருவள்ளுவர்.

***

மாலன், அர்னாப் வகையறா சங்கி பத்திரிகையாளர்கள் மட்டுமல்லாமல், ஆளும் அரசுக்கு கூஜா தூக்கும் பல ஊடகங்களுக்கும் சமூக ஊடகங்களில் கண்டனங்கள் எழுந்துள்ளன.
“ தினந்தந்தி – தமிழ்நாட்டின் நாடித் துடிப்பு. அதிகபடியான தமிழர்களால் வாசிக்கப்படக் கூடிய தினசரி.
நேற்று : “பழி தீர்த்தது இந்தியா”.
இன்று : “பதிலடி தாக்குதலில் ஈடுபட்ட போது, சென்னை விமானி சிக்கினார். வீடியோ வெளியிட்டதுக்கு இந்தியா கண்டனம்”.
இவை இரண்டும் தான் தலைப்பு செய்திகள்.
இதை கொட்டை எழுத்தில் போட்டு விட்டு, பக்கத்தில் அபிநந்தனின் இரண்டு புகைப்படங்களை வெளியிட்டு இருக்கிறது. வீடியோ வெளியிடக் கூடாது என்று இந்தியா சொன்னதை சொல்லிக் கொண்டே, புகைப்படங்களை வெளியிட்டு, “பார்த்தீங்களா மக்களே, இப்படி தான் பாகிஸ்தான் நம்முடைய வீரர்களை நடத்துகிறது” என்று சொல்லாமல் சொல்வது எந்த மாதிரியான நயத்தகு ஊடக தர்மம்? இதை ஊடக வேசித்தனம் என்று சொல்லாமல், வேறு எப்படி டிப்ளமேடிக்காக சொல்வது???
உள்ளே ஒரு பெட்டி செய்தியாய் ‘மசூத் அசார் ஒத்துக் கொண்டார்’ என்று ஒரு செய்தி வருகிறது. மசூத் அசார் இதற்கு முன் சொன்ன எல்லாவற்றையும் புறந்தள்ளிவிட்டு, இப்போது 300 – 350 தீவிரவாதிகள் கொல்லப்பட்டார்கள் என்று சொன்ன பொய்யினை சமன் செய்ய, திடீரென என்ன மசூத் அசாரின் மீது அக்கறை? இதற்கு முன் மசூத் அசார் பேசியது அத்தனையும் பெரும் பிரசாரங்கள். பொய்கள். ஜிகாதி உளறல்கள். நேற்று சொன்னது மட்டும் சத்தியம். என்ன லாஜிக் இது?
மசூத் அசார் உருதுவில் சொன்னது பாகிஸ்தானிய உருது இதழ்களில் வெளியாகி இருக்கிறது. கூகிள் ட்ரான்ஸ்லேட் வைத்தால் ஒரளவிற்கு புரியும். அவர் சொன்னது “இந்திய விமானங்கள் அத்து மீறி பாகிஸ்தானுக்குள் நுழைந்திருக்கின்றன” என்பது மட்டுமே. ஆனால், தினந்தந்தி மசூத் அசார் முழுமையாக ஒத்துக் கொண்டார் என்று எழுதுகிறது.
பாகிஸ்தான் இரண்டு மிக் விமானங்களை வீழ்த்தியது என்று பாகிஸ்தான் பிரதமரே பகிரங்கமாக ட்வீட் போடுகிறார். ஆனால் அதைப் பற்றி ஒரு வார்த்தை கூட இல்லை. இந்திய சார்பு ஊடகங்கள், இந்திய நிலையினை எடுப்பதில் நமக்கு சிக்கலில்லை. ஆனால், நெடுசாண்கிடையாக இப்படி மோடிக்கு கால் கழுவி விட வேண்டிய அவசியமென்ன? பிறகு என்ன எம்-மிற்கு நடுநிலை நாளிதழ் என்கிற பெயர்? இதற்கு பேசாமல் ‘தினமலர்’ மாதிரியும், அதன் முன்னாள், இந்நாள் ஆசிரியர்கள் மாதிரியும் இருந்து விட்டு போகலாமே? ஊடகங்களில் இருக்கும் “மாமாக்கள்” என்ன வேலை செய்து கொண்டு இருக்கிறார்கள் என்பது ஊரறிந்தது. ஆனால் ஊடகமே “மாமா” வேலை பார்த்தால் எங்கே போய் முட்டிக் கொள்வது?
ஆதித்தனார் குடும்பம் என்பதால் தான் உங்களுக்கு தமிழகத்தில் மரியாதை. அதை நீங்களே கெடுத்துக் கொண்டால், நாளை மக்களை குறை சொல்லாதீர்கள்.” என்கிறார் நரேன் ராஜகோபாலன்.
“நாட்டில் நல்லது கெட்டது என்ன நடந்தாலும் அதனால் ஒரு மயிரைக்கூட இழக்காமல் லாபம் மட்டுமே பார்க்கும் மேட்டுக்குடிகளின் கொழுப்பெடுத்த வாய்கள் இப்படித்தான் பேசும்.
பார்ப்பனீயம் என்பது மனிதக் கறியை ருசி பார்க்கும் சிந்தனை, அதனால்தான் அது ஆடு போன்ற அல்ப இறைச்சியை புசிப்பதில்லை.” என்கிறார் வில்லவன் இராமதாஸ்.
ஐந்தாண்டு கால ஆட்சி, இந்தியாவின் பேரழிவாக அமைந்துவிட்ட நிலையில், பதவி போகக்கூடும் என்ற கணிப்பில் போர் என்ற பேரழிவு ஆயுதத்தை கையிலெடுத்துள்ளது மோடி தலைமையிலான இந்துத்துவ அரசு. இந்துத்துவ கும்பலைத் தவிர, பொது மக்கள் எவரும் போரையும் விரும்பவில்லை; மோடி நடத்தும் நாடகத்தையும் இனம் கண்டுவிட்டார்கள்.
மோடியின் ஊதுகுழல்களாக மாறிவிட்ட பத்திரிகையாளர்களும் ஊடகங்களும் பொய் பித்தலாட்டங்களை மறைக்க தேசபக்தியின் பெயரால் போர் வெறி பரப்புரை செய்கின்றனர். இந்துத்துவ கும்பலோடு, இந்த ஊதுகுழல்களையும் மக்கள் ஒதுக்கித் தள்ள வேண்டும்.
நன்றி,தொகுப்பு : வினவு செய்திப் பிரிவு

வெள்ளி, 22 பிப்ரவரி, 2019

கரையா?சிறையா??

கடனில் அனில் அம்பானி.
கரை ஏறுவாரா?   சிறை ஏகுவாரா?
"2006-ம் ஆண்டு, அமெரிக்காவின் பிரபல பிசினஸ் பத்திரிகையான `ஃபோர்ப்ஸ்' வெளியிட்ட இந்தியப் பணக்காரர்கள் பட்டியலில் 14.8 பில்லியன் டாலர் சொத்துமதிப்புடன் மூன்றாவது இடத்தில் இருந்தவர் அனில் அம்பானி. 
ஆனால், இன்று அவரது ரிலையன்ஸ் கம்யூனிகேஷன் நிறுவனத்தின் வீழ்ச்சியும், அதனால் ஏற்பட்ட கடனும் அவரை சிறைக்கம்பிகளுக்குப் பின்னால் தள்ளும் அளவுக்கு அச்சுறுத்திக்கொண்டிருக்கின்றன."

ரிலையன்ஸ் குழுமத்தின் நிறுவனரான திருபாய் அம்பானியின் மறைவுக்குப் பிறகு, முகேஷ் அம்பானியும் அனில் அம்பானியும் இணைந்து நிறுவனத்தைக் கவனித்துவந்தனர். 

என்றாலும், நிர்வாக விஷயங்களில் ஆரம்பக்காலம் தொட்டே மூத்த சகோதரரான முகேஷ் அம்பானியின் கையே ஓங்கியிருந்தது.

 இந்த நிலையில், அனிலின் அரசியல் ஆர்வம், சமாஜ்வாதிக் கட்சியின் ஆதரவுடன் எம்.பி-யானது, பிறகு இரண்டே வருடத்தில் அந்தப் பதவியை ராஜினாமா செய்தது போன்றவை எல்லாம் ரிலையன்ஸ் நிறுவனத்தின் இமேஜை பாதிக்கும் வகையில் இருப்பதாக முகேஷ் கருதினார். 
இதனால், ஒருகட்டத்தில் நிறுவனத்தின் ஒட்டுமொத்த நிர்வாகத்தையும் தனது கட்டுப்பாட்டின்கீழ் கொண்டுவந்தார். 
முகேஷ் அம்பானியின் சம்மதம் இல்லாமல் அனில் தன்னிச்சையாக எதையும் நிறுவனம் சார்பில் செயல்படுத்த முடியாத நிலை ஏற்பட்டது. 

இது அனிலுக்கு கடும் கோபத்தை ஏற்படுத்திய நிலையில், தன் தாயார் கோகிலா பென்னிடம் பிரச்னையைக் கொண்டுசென்று, தனக்கு சொத்தைப் பிரித்துத் தருமாறு கேட்டார். 
முதலில் அதிர்ச்சியடைந்த கோகிலா, அனிலை சமாதானப்படுத்திப் பார்த்தார். ஆனால், தனது பங்கைப் பிரித்துக்கொண்டு செல்வதில் அனில் உறுதியாக இருந்ததால், சில பிசினஸ் ஆலோசகர்கள் மற்றும் நிபுணர்களின் உதவியுடன் 2005-ம் ஆண்டு ரிலையன்ஸ் குழுமத்தின் சொத்துகள் பிரிக்கப்பட்டன. 

அதன்படி, எண்ணெய் மற்றும் இயற்கை எரிவாயு சுத்திகரிப்பு திட்டங்களைச் செயல்படுத்தும் ரிலையன்ஸின் முக்கிய நிறுவனமான ஆர்.ஐ.எல்  மற்றும் அதன் பெட்ரோ கெமிக்கல் நிறுவனமான ஐ.பி.சி.எல் ஆகியவை முகேஷ் அம்பானிக்குக் கொடுக்கப்பட்டன. ரிலையன்ஸ் இன்ஃபோ.காம், ரிலையன்ஸ் கேபிடல் மற்றும் ரிலையன்ஸ் எனர்ஜி ஆகியவை அனிலுக்கு பிரித்துக் கொடுக்கப்பட்டன. 


சொத்துப் பிரிப்பு நடந்த காலகட்டத்தில், அப்போதுதான் செல்போன் பரவலாக அறிமுகமாக ஆரம்பித்திருந்ததால், டெலிகாம் துறைக்கு நல்ல எதிர்காலம் இருந்தது. 
அந்த வகையில் டெலிகாம் துறையை தன்வசப்படுத்திக்கொண்ட அனிலின் நடவடிக்கை புத்திசாலித்தனமானதாகப் பார்க்கப்பட்டது. 

அதேசமயம், முகேஷ் அம்பானியின் கையில் சென்ற எண்ணெய் மற்றும் எரிவாயுத் திட்டங்களைச் செயல்படுத்தும் ரிலையன்ஸ் இண்டஸ்ட்ரீஸ் நிறுவனம், சர்வதேசச் சந்தையின் சூழல் காரணமாக அப்போது நெருக்கடியைச் சந்தித்துக்கொண்டிருந்தது.
 இதனால், 2006-ம் ஆண்டில் முகேஷ் அம்பானியைக் காட்டிலும் அனிலின் சொத்துமதிப்பு சுமார் 550 கோடி ரூபாய் அதிகமாக இருந்தது.
 அத்துடன் மேலே சொன்னபடி நாட்டின் பணக்காரர் பட்டியலிலும் 3-வது இடத்தைப் பிடித்தார் அனில் அம்பானி. 

அனிலும் ,முகேஷும்.
இப்படி உயரத்துக்குச் சென்ற அனில் அம்பானிதான் இன்றைக்கு 46,000 கோடி ரூபாய் கடனில் சிக்கித் தவிப்பதோடு, எரிக்சன் நிறுவனத்துக்கான 453 கோடி ரூபாய்க் கடனைக்கூட கட்ட முடியாமல் தவித்துவருகிறார்.
 இந்தக் கடனை நான்கு வாரங்களுக்குள் கட்டாவிட்டால் சிறைக்குச் செல்லக்கூடிய அபாயத்தையும் எதிர்நோக்கியுள்ளார். 

முன்னதாக, ரிலையன்ஸ் கம்யூனிகேஷன்ஸ் நிறுவனத்தின் ஸ்பெக்ட்ரம் சொத்துகளை விலைக்கு வாங்கிக்கொண்டு தனது கடனை அடைக்க உதவுமாறு சகோதரர் முகேஷ் அம்பானியின் உதவியையும் நாடினார் அனில். 
அப்படிச் செய்தால், மொத்த கடன்தொகை 18,000 கோடி ரூபாயாகக் குறையும் என மதிப்பிடப்பட்டது. 

ஆனால், அப்படி விலைக்கு வாங்கும்போது ரிலையன்ஸ் கம்யூனிகேஷன்ஸ் நிறுவனத்தின் பழைய கடன்களுக்கும் உத்தரவாதம் அளிக்குமாறு தமது நிறுவனத்தைக் கேட்கக் கூடாது என்று முகேஷ் அம்பானி விதித்த நிபந்தனையால், அது நடக்காமல்போனது. 
இதன் காரணமாகவே, தற்போது எரிக்ஸன் நிறுவனத்து மட்டுமான கடன் நிலுவைத் தொகையான 450 கோடி ரூபாயை அடுத்த நான்கு வாரத்துக்குள் அனில் அம்பானி திருப்பிச் செலுத்தவில்லை என்றால், சிறை செல்ல வேண்டியிருக்கும் எனப் புதன்கிழமையன்று எச்சரித்தது உச்ச நீதிமன்றம்.
 இது தொடர்பான நீதிமன்ற அவமதிப்பு வழக்கிலும் அனிலை குற்றவாளி எனத் தீர்ப்பளித்து, 1 கோடி ரூபாயை அபராதமாகவும் விதித்தது. 

இந்நிலையில், எரிக்ஸன் நிறுவனத்துக்கான கடனை அனில் எப்படித் திருப்பிச் செலுத்தி, சிறைத்தண்டனையிலிருந்து தன்னைக் காப்பாற்றிக்கொள்ளப்போகிறார் என்ற எதிர்பார்ப்பு, தொழில்துறை வட்டாரங்களில் எழுந்துள்ளது. 

கடனைத் திருப்பிச் செலுத்துவதற்கு, ஏற்கெனவே கடந்த அக்டோபர் மாதம் ஒருமுறை கால அவகாசம் பெற்று, பிறகு மீண்டும் ஒருமுறை கால அவகாசம் கோரி, அதைத் திரும்பப் பெற்றுக்கொண்டார் அனில்.
 இது தொடர்பான வழக்கில் உச்ச நீதிமன்றத்தில் வாதிட்ட எரிக்ஸன் நிறுவன வழக்குரைஞர்கள், ``அனிலின் இந்த நடவடிக்கை, கடனைத் திருப்பிச் செலுத்துவதற்கான எண்ணம், அவரிடம் இல்லை என்பதையே காட்டுகிறது.
 அனில், நூற்றுக்கணக்கான கோடி ரூபாய் மதிப்பிலான தனது நிறுவன சொத்துகளை விற்றுள்ளது மட்டுமல்லாது, பிரான்ஸ் நாட்டின் டசால்ட் நிறுவனத்துடன் ரஃபேல் விமான ஒப்பந்தம் செய்துகொள்ளும் அளவுக்கும் பணம் வைத்துள்ளார்’’ என்று குற்றம்சாட்டினர். 

இந்நிலையில், உச்ச நீதிமன்றத்தின் தீர்ப்பைத் தொடர்ந்து அறிக்கை ஒன்றை வெளியிட்ட ரிலையன்ஸ் கம்யூனிகேஷன்ஸ் (ஆர்காம்) நிறுவனம், தீர்ப்பை ஏற்று அதன்படி நடந்துகொள்வோம் எனக் கூறியிருந்தது. 

தற்போது கடனை அடைக்க, அனிலுக்கு நிறுவன ஆவணங்களின் அடிப்படையில் பல வாய்ப்புகள் உள்ளதாகத் தோன்றினாலும், அதை நிறைவேற்றுவது என்பது சவால்மிகுந்ததாக இருக்கும் எனக் கூறப்படுகிறது.
 தற்போது அனில் அம்பானி முன் மூன்று வாய்ப்புகள் உள்ளன. ஒன்று, 2017-ம் ஆண்டு செய்துகொள்ளப்பட்ட ஒப்பந்தத்தின்படி ரிலையன்ஸ் கம்யூனிகேஷன்ஸ் நிறுவனத்தின் சொத்துகளை முகேஷ் அம்பானியின் ரிலையன்ஸ் ஜியோ நிறுவனத்துக்கு விற்பது அல்லது ரிலையன்ஸ் குழும நிறுவனங்களான (அனிலுக்குச் சொந்தமானவை) ரிலையன்ஸ் கேப்பிட்டல், ரிலையன்ஸ் இன்ஃப்ராஸ்ட்ரக்சர் மற்றும் ரிலையன்ஸ் நேவல் மற்றும் இன்ஜினீயரிங் ஆகிய நிறுவனங்களின் உதவியைக் கோருவது அல்லது ஜியோ ஒப்பந்தத்தில் இடம்பெறாத ஆர்காம் சொத்துகளை (சர்வதேசப் பங்குச்சந்தைகள் மற்றும் ரியல் எஸ்டேட்) விற்பது. 

ஆனால், ``பழைய கடன்களுக்கு பொறுப்பேற்றுக்கொள்ள மாட்டேன்’’ என்ற முகேஷ் அம்பானியின் பின்வாங்கல் முதலாவது வாய்ப்பைச் செயல்படுத்த முடியாத நிலையை ஏற்படுத்திவிட்டது. 
 ஜியோவுக்கு அல்லாமல் வேறு டெலிகாம் நிறுவனத்துக்கு விற்க முயன்றாலும் இதே நிபந்தனைதான் விதிக்கப்படும் என்பதால், அதைக் கைவிடும் நிலைதான்.
அனில் அம்பானி
அனிலுக்குச் சொந்தமான பிற நிறுவனங்களின் உதவியைக் கோரினால், அந்த நிறுவனங்களின் குறைந்த சதவிகிதப் பங்குகளை வைத்திருப்பவர்களிடமிருந்து எதிர்ப்பு வரும் என்பதாலும், அவற்றின் நிர்வாகத்தன்மை குறித்து கேள்விகள் எழும் என்பதாலும் இரண்டாவது வாய்ப்பும் அடிபட்டுப்போகிறது. 
மூன்றாவதாக ஜியோ ஒப்பந்தத்தில் குறிப்பிடாத மற்ற சொத்துகளை விற்கலாம் என்றால், அதை வாங்கக்கூடிய தகுதியான நிறுவனத்தைத் தேட வேண்டும். 
ஏற்கெனவே கடந்த சில வருடங்களாக இதற்கான முயற்சிகள் மேற்கொள்ளப்பட்டும், பயன் ஏதுமில்லை. 

இத்தகைய நிலையில், அனில்  எத்தகைய நடவடிக்கையை மேற்கொண்டு தன்னைச் சூழந்துள்ள நெருக்கடியிலிருந்து மீண்டு வரப்போகிறார் என்பது தொழில்துறை மற்றும் முதலீட்டாளர்கள் வட்டாரங்களின் எதிர்பார்ப்பாக உள்ளது.

  "இப்படியான நிதி நெருக்கடியில் சிக்கிக்கொண்டிருக்கும் அனில் அம்பானியின் ரிலையன்ஸ் டிஃபென்ஸ் லிமிடெட் நிறுவனம், ரஃபேல் விமானத்தைத் தயாரிக்கும் பல்லாயிரம் கோடிகளுக்கான அதுவும் நாட்டின் பாதுகாப்பு முக்கியத்துவம் வாய்ந்த ஒப்பந்தத்தில் எப்படிச் சேர்த்துக்கொள்ளப்பட்டது என்ற கேள்வி உங்களுக்குள் எழுந்திருக்கவேண்டும்.
அதற்குண்டான தகுதி நிறைய அனில் அம்பானிக்கு நிறையவே உண்டு.
அவர் நரேந்திர மோடிக்கு நண்பர்.


 
                                                                                                                   -பா. முகிலன்(விகடன்)

ஞாயிறு, 17 பிப்ரவரி, 2019

தவறு நமது தரப்பில்தான் !

 ஜம்மு-காஷ்மீர், புல்வாமா மாவட்டம், காக்கபோராவை சேர்ந்த 22 வயதான அகமது தர், பாகிஸ்தானில் இருந்து இயங்கும் ஜெய்ஷ்-இ-முகமது இயக்கத்தில் கடந்த ஆண்டு சேர்ந்துள்ளான்.
சிஆர்பிஎஃப் வாகன அணிவகுப்பில், வெடிபொருள் நிரப்பிய வாகனத்தை மோதவிட்டு தாக்குதலை நிகழ்த்தியது இவனே எனக் கூறப்படுகிறது.

வெடிபொருட்கள் துளைத்து பெரும் சேதத்தை ஏற்படுத்தும் வகையில் வடிவமைத்து இந்த தாக்குதல் நடத்தப்பட்டிருப்பதாகவும் கூறப்படுகிறது. இந்த தாக்குதல் நிகழ்ந்தவுடன் ஒரு உடல் 80 மீட்டர் தூரத்திற்கு தூக்கி எறியப்படும் அளவுக்கு பயங்கர சக்தி வாய்ந்ததாகக் கூறப்படுகிறது.
 100 மீட்டர் சுற்றளவுக்கு மனித உடல் பாகங்கள் சிதறி கிடந்துள்ளன.

ஸ்கார்ப்பியோ எஸ்யுவி ரக காரில் ஆர்டிஎக்ஸ் வெடிபொருளை நிரப்பி வந்து தீவிரவாதி மோதியதாக தகவல் வெளியானது. ஆனால், தாக்குதலுக்கு பயன்படுத்தப்பட்டது செடான் ரக கார் என்றும் கூறப்படுகிறது.

இதேபோல, வாகனத்தை சிஆர்பிஎஃப் பேருந்தின் மீது மோதவில்லை என்றும், அருகில் சென்றதும் டெட்டனேட்டர் பயன்படுத்தி வெடிபொருட்களை வெடிக்கச் செய்ததாகவும் கூறப்படுகிறது.

எனவே பயன்படுத்தப்பட்ட வாகனம், வெடிபொருளின் தன்மை, அளவு, தாக்குதல் நிகழ்த்தப்பட்ட முறை போன்றவற்றை உறுதிப்படுத்துவதற்கான ஆய்வுகள் நடைபெற்று வருகின்றன.
இதற்காக தாக்குதல் நடைபெற்ற இடத்தில், தேசிய புலனாய்வு நிறுவன குழுவினர், தடயவியல் வல்லுநர்கள் உதவியுடன், மாதிரிகளை சேகரித்துள்ளனர்.
அந்த சாலை மிகவும் கண்காணிப்பிற்குரிய சாலை.
ராணுவ நடமாட்டம் அதிகம்.
சாதாரணமாக சாலைகளில் செல்வது போல் அச்சாலையில் மக்கள் அதில் பயணிப்பது கடினம்.கடந்து செல்லும் வாகனங்கள் கடும் சோதனைக்குப்பின்னர்தான் அனுமதிக்கப்படும்.


இரண்டு  நாட்களாக பாதுகாப்பு படை வீரர்கள் நகர்வுக்காக தீவிர கண்காணிப்பில் உள்ளது.
சிலநாட்களுக்கு முன்னர்தான் அப்பகுதியில் பாரிய தாக்குதல் நடக்க பயங்கரவாதிகள் திட்டமிட்டுள்ளனர் .எந்த வேலையும் நடக்கலாம் என உளவுத்துறை எச்சரித்துள்ளது.
 தற்கொலைத் தாக்குதலுக்கு முன்னர் துணை ராணுவப்படையினர் மீது அதே இடத்தில் வைத்து துப்பாக்கிச் சூடும் நடத்தப்பட்டதாக தகவல்கள் கூறுகின்றன.

அப்படி பட்ட நிலையில் 350 கிலோ வெடிமருந்து காரில் ஒருவன் கொண்டுவந்தது எப்படி?
ஒருவர்க்கண்ணிலும்,சோதனையிலும் அதுவும் வீரர்கள் வரும் வேளையில் சாதாரணமாக கொண்டுவரப்பட்டது எப்படி?

சிஆர்பிஎஃப் வாகன அணிவகுப்பு செல்வதற்கு ஒரு மணி நேரத்திற்கு முன்னர் சோதனை செய்யப்பட்ட நெடுஞ்சாலையில், தீவிரவாதி நுழைய முடிந்தது எப்படி?

 தாக்குதலுக்கு முன்னர் 10 கிலோமீட்டர் தொலைவில் ஆர்டிஎக்ஸ் வெடிபொருட்களுடன் யார் கண்ணிலும் படாமல் மறைந்திருந்தது எப்படி? என்பது குறித்தும் விசாரணை நடைபெற்று வருகிறது.

இது தொடர்பாக புல்வாமா மற்றும் அவந்திபோராவை சேர்ந்த 7 பேரை பிடித்து ஜம்மு-காஷ்மீர் போலீசார் விசாரணை நடத்தி வருகின்றனர். தாக்குதல் நடத்தப்பட்ட அன்று இரவு இவர்கள் 7 பேரையும் சந்தேகத்தின்பேரில் பிடித்து போலீசார் விசாரித்து வருகின்றனர்.

 தாக்குதலுக்கான சதித் திட்டம், புல்வாமா மாவட்டத்தின் ட்ரால் நகரில் மிடூரா என்ற பகுதியில் தீட்டப்பட்டிருக்கலாம் என சந்தேகிக்கும் போலீசார், ஜெய்ஷ்-இ-முகமது இயக்கத்தை சேர்ந்த நபர் ஒருவரையும் தேடி வருகின்றனர்.

 1) 350 கிலோ வெடிபொருள் உயர் பாதுகாப்பு உள்ள தேசிய நெடுஞ்சாலைக்கு எவ்வழியாக  வந்தது?

 2) 2500 படைவீரர்களை ஒரே நேரத்தில் நேற்று அதிகாலை நகர்த்த உத்தரவிட்டது யார்?

  3) பக்சி ஸ்டேடியம் Transit Camp க்கு 30 கிமீ அருகில் 2 நாட்கள் பாதுகாப்பு நடவடிக்கை ஏதும் இல்லையா?

இப்படி பல கேள்விகள் எழுகின்றன ?


மக்களவையின் கடைசி கூட்டம் முடிந்தது.தேர்தல் அறிவிப்பு வரவிருக்கிறது.அவ்வேளையில் இப்படி ஒரு பயங்கரம்.பதட்டம்.போர்சூழல்.இதன் மூலம் தட்டி எழுப்பப்படுகிறது தேசபக்தி.

ஏதோ திரைக்கதை அமைப்புபோல் இருக்கிறது. தற்செயல்தானா?
சிலர் வேடிக்கையாக "ஒரு பீர் பாட்டிலையே புதுச்சேரியில் இருந்து கொண்டுவர முடியலையே.ராணுவ கண்காணிப்பை மீறி எப்படிங்க?என்பது வேடிக்கையான கேள்வியல்ல வேதனை வெளிப்பாடு .
இன்று மக்கள் பலரின் மனதில் எழும் கேள்வியும் அதுதான்.

 "பெருமளவிலான வெடிபொருட்கள் நிரம்பிய வாகனம் சுற்றிக் கொண்டிருந்து எப்படி நிர்வாகத்தின் கண்களில் இருந்து தப்பியது என்பது வருத்தப்படச் செய்கிறது.
துணை ராணுவப்படையினரின் வாகன அணிவகுப்பு எதோவொரு இடத்தில் உடைக்கப்பட்டிருக்கிறது. 2500 பேர் ஒன்றாக செல்ல முடியாது. ஐ.ஈ.டி குண்டு வெடிப்பு நடைபெறுவதாக இருந்தால் வாகனங்கள் வேகமாக சென்று கொண்டிருக்க வேண்டும். 
 ஆனால், வாகனங்கள் அணிவகுத்துச் செல்லும்போது, அவை மிதமான வேகத்தில்தான் செல்லும். யாரோ வந்து வாகன அணிவகுப்பின் மீது தாக்குதல் நடத்தியிருக்கிறார்கள் என்னும்போது, நமது தரப்பில்தான்  எங்கோ தவறு நடைபெற்றிருப்பது தெளிவாக தெரிகிறது,"

இதை சொல்லியவர் நமது டீக்கடை திண்டு அரசியல் பேசுபவர் அல்ல.  ஜம்மு-காஷ்மீர் மாநில ஆளுநர் சத்யபால் மலிக்.

பாதுகாப்புத்துறையை ,அதன் தேவைகளை தனியாரிடம் விடுவதன் எதிர்விளைவுகளில் ஒன்றுதான் பாதுகாப்புக்குறைபாடு.

                  "இதற்கு முன்னதாக, ஐ.ஈ.டி வெடிப்பு அல்லது துப்பாக்கிச்சூடு போன்ற முறைகளில் பள்ளத்தாக்கில் படைவீரர்கள் தாக்குதல் நடைபெறும்
 இதை தவிர்ப்பதற்காக வாகன அணிவகுப்பு செல்லும் பாதைகளில் தீவிர பாதுகாப்பு சோதனை எனப்படும் ஆர்.ஓ.பி (Road opening party) மேற்கொள்ளப்படும்.

சி.ஆர்.பி.எஃப் வீரர்கள் இந்த ஆர்.ஓ.பி நடைமுறையை அதிக அளவில் பயன்படுத்துவார்கள்.
ராணுவ வீரர்கள் செல்லும் பாதை முற்றிலுமாக சோதிக்கப்பட்டு பாதுகாப்பை உறுதி செய்வது இந்த ஆர்.ஓ.பி பிரிவினவரின் பணியாகும். 

படையினர் செல்லும் வழிகள், சாலைகள், பாலங்களின் ஓரங்களில் இருக்கும் கடைகள் மற்றும் கிராமங்களில், மோப்ப நாய், நவீன உபகரணங்களை பயன்படுத்தி வெடிபொருட்கள் இருக்கிறதா என்பதை பரிசோதிப்பார்கள். 
 மேலும், கண்ணிவெடிகள் புதைக்கப்பட்டிருப்பதை கண்டறிவதற்காக, அந்தப் பகுதிகளில் நிலத்தில் எதாவது குழிகள் தோண்டப்பட்டிருக்கிறதா என பல்வேறுவிதமான சோதனைகளையும் மேற்கொள்வார்கள். 

இந்த ஆர்.ஓ.பி பிரிவினரின் பணி, வெறும் சாலை மற்றும் அதையொட்டிய கிராமங்களில் சோதனைகளை மேற்கொண்டு பாதுகாப்பை உறுதிபடுத்துவது மட்டுமல்ல, சாலையிலிருந்து தொலைவில் இருக்கும் பகுதிகளையும் தங்கள் கண்காணிப்பு வலையத்திற்குள் கொண்டுவரும் பணியையும் அவர்கள் மேற்கொள்வார்கள்.
ஆனால் தற்போதைய தாக்குதலுக்கு முன்பு அப்படி கண்காணிப்பு செய்யப்பட்டதா என்பது தெரியவில்லை.அப்படி நடந்திருந்தால் இப்படி தாக்குதல் நடக்க வாய்ப்பில்லை." என்கிறார் எல்லைப் பாதுகாப்புப் படையின் முன்னாள் தலைவர் பி.கே மிஷ்ரா.

இந்நிலையில் இந்திய அரசுக்கு H A L இருக்கையில்அதை தவிர்த்து விட்டு , போர் விமானங்களை வெளிநாடுகளில் வாங்குவதும்,அதன் தொழில் நுட்பத்தைஅதை பராமரிக்கும் உரிமையை, அம்பானி போன்ற தனியார் கார்ப்பரேட் கையில் கொடுப்பதும் எப்படிப்பட்ட புத்திசாலித்தனம்.
 தனது கார்பரேட்கள் விசுவாசத்தைக்காட்ட நாட்டின் பாதுகாப்பையா,மக்களின் வரிப்பணத்தையா அவர்கள் கையில் ஒப்படைப்பது.?

அரசு நிர்வாகம்,குடிநீர்,ரெயில்வே,விமானம்,வங்கிகள்,காப்பீட்டுக்கழங்கள் ,பொதுத்துறை நிறுவங்கள் எல்லாமே தனியார்,கார்ப்பரேட் கள் கையில் ஒப்படைப்பது என்றால் மக்களால் வாக்களிக்கப்பட்டு இவர்களைத்தேர்ந்தெடுத்தது ஆட்சி செய்ய அனுப்புவது எதற்கு.?

மக்களவையில் நாற்காலிகளைத்தேய்த்துவிட்டு மக்கள் வரிப்பணத்தில் சம்பளம்,ஓய்வூதியம்,மற்ற வசதிகளை அனுபவிக்கவா?
இதற்கு ஆண்டாண்டு கர்ப்பரேட்களுக்கு ஆட்சி உரிமையை குத்தகைக்கு கொடுத்து விடலாமே?

2014 ஆரம்பங்களில் மோடி தேர்தல் மேடையில் முழங்கியது இப்போது அவருக்கே எதிராக திரும்பியுள்ளது.

"இந்தியாவில் யாருக்குமே பாதுகாப்பில்லை.குஜராத்,கேரளா,தமிழ்நாடு என்று இந்திய முழுமையுமே பாதுகாப்பின்மை,அச்சம் உள்ளது.ராணுவ வீரர்களுக்கே பாதுகாப்பில்லை.இப்படிப்பட்ட ஆட்சியை வைத்திருக்கலாமா?தூக்கி எறியும் நேரம் வந்து விட்டது.தேர்தல் அதற்கு உங்களுக்கு வாய்ப்புத்தந்துள்ளது.அதை பயன்படுத்தி இக்கேடு கெட்ட ஆட்சியை தூக்கி எறியுங்கள்."

அதுதான் நடக்கப்போகிறதா?அதைத்தான் மக்கள் செய்யப்போகிறார்களா?

புல்வாமா பயங்கரம்


 யார் காரணம்?
பிப்ரவரி 14ம் தேதி ஜெய்ஷ்-இ-முகம்மது எனும் தீவிரவாத அமைப்பு காஷ்மீர் புல்வாமா மாவட்டத்தில் நடத்திய கோழைத்தனமான கொடூரமான தாக்குதலில் மத்திய ஆயுதப்படையைச் சேர்ந்த 40 வீரர்கள் கொல்லப்பட்டனர்.
வீர மரணம் அடைந்தவர்களில் இருவர் தமிழகத்தை சேர்ந்தவர்கள்.

 இந்திய தேசமே இந்த வீரர்களின் குடும்பங்களுக்கு அஞ்சலி செலுத்துகிறது.
எனினும் இந்த குடும்பங்களின் இழப்பை எவரும் ஈடு செய்ய இயலாது.

இந்த தாக்குதலுக்கு பாகிஸ்தானில் உள்ள ஜெய்ஷ்-இ-முகம்மது உரிமை கோரியுள்ளது.
எனவே பாகிஸ்தான் அரசாங்கம் தனது பொறுப்பை தட்டிக் கழிக்க முடியாது.
 இந்தியாவும் உலக நாடுகள் பலவும் தொடர்ந்து வற்புறுத்தியும் எப்படி தீவிரவாத அமைப்புகள் பாகிஸ்தானில் சுதந்திரமாக செயல்படுகின்றன எனும் கேள்விக்கு இம்ரான்கான் அரசாங்கம் பதில் சொல்லியே தீர வேண்டும்.

பாஜக விடுதலை செய்த தீவிரவாதத் தலைவன்
புல்வாமா கொடூரமான தற்கொலை தாக்குதலை நடத்தியது 19 வயதே ஆன ஆதில் அகமது தர் எனும் காஷ்மீரி இளைஞன்!
இதற்கு முன்பும் 16 வயதுள்ள சிறுவனை கூட ஜெய்ஷ்-இ-முகமது அமைப்பு தற்கொலை தாக்குதலுக்கு பயன்படுத்தி யுள்ளது.
 இத்தகைய தாக்குதல்கள் தொடரும் என ஆதில் அகமது தாக்குதலுக்கு சில நிமிடங்களுக்கு முன்பு பதிவு செய்யப்பட்ட காணொலியில் மிரட்டுவதை ஒதுக்கித் தள்ளிவிட முடியாது.
 இந்த காணொளியை நீங்கள் பார்க்கும் பொழுது நான் சொர்க்கத் தில் இருப்பேன் என ஆதில் கூறுவது, எந்த அளவிற்கு அந்த இளைஞன் மூளைச் சலவைசெய்யப்பட்டுள்ளான் என்பதை உணர்த்து கிறது. இத்தகைய இளம் வயதினர் ஏன் தீவிரவாதம் பக்கம் சாய்கின்றனர் என்பதும் கவலையுடன் பரிசீலிக்க வேண்டிய அவசர அவசிய அம்சம் ஆகும்.

ஜெய்ஷ்-இ-முகம்மது பாகிஸ்தானிலிருந்து தீவிரவாதிகளை அனுப்பிக் கொண்டிருந்தது.
ஆனால் சில ஆண்டுகளாக காஷ்மீர் உள்ளூர்இளைஞர்களை ஈர்ப்பதில் ஜெய்ஷ்-இ-முகம்மது வெற்றி அடைந்துள்ளது.
 இது மிகவும் ஆபத்தான ஒன்றாகும். இந்த தீவிரவாத அமைப்பின் தலைவன் மசூத் அசாத் என்பவன்!

பாகிஸ்தானில், அந்த நாட்டின் உளவு அமைப்பு மற்றும் இராணுவ உதவி யுடன் செயல்படும் இந்த தீவிரவாதி 5 ஆண்டுகள் இந்திய சிறைகளில் இருந்தவன் என்ப தை நம்ப முடிகிறதா?
ஆம் 1994 முதல் 1999வரை இந்திய சிறைகளில் இருந்தான் மசூத் அசாத்!

1999ஆம் ஆண்டில் வாஜ்பாய் பிரதமராக இருந்த பொழுது இந்திய விமானம் கடத்தப் பட்டு காந்தஹாரில் நிறுத்தப்பட்டது.
இந்த விமானம் அமிர்தசரசில் இறங்கிய பொழுது அதனை முடக்கியிருக்க முடியும். ஆனால்பா.ஜ.க. அரசாங்கத்தின் கையாலாகாத்தனத் தால் அது தப்பியது.

பின்னர் விமான பயணிகளை காப்பாற்ற அன்றைய வெளியுறவு அமைச்சர் ஜஸ்வந்த் சிங், மசூத்தை தன்னுடன் அழைத்துச் சென்று தீவிரவாதிகளிடம் ஒப்படைத்தார். அதாவது விடுதலை அளித்தார்.
அந்த மசூத் அசாத் இன்று காஷ்மீரில் பயங்கர வாதத்தை அரங்கேற்றும் முக்கிய தீவிரவாத தலைவனாக உருவெடுத்துள்ளான்.
 இந்திய இராணுவ வெளியுறவு வரலாற்றில் ஒரு கையாலாகாத்தனம் இருந்தது எனில் அது பாஜக ஆட்சி நடத்திய அந்த தருணம்தான்.

கடும் பாதுகாப்பை தீவிரவாதி மீறியது எப்படி?
புல்வாமாவில் தாக்குதல் எப்படி நடந்தது என்பது அனைவருக்கும் அதிர்ச்சியாக உள்ளது.
ஏனெனில் 2400க்கும் அதிகமான வீரர்கள் 75 வாகனங்களில் வந்த ஜம்மு-ஸ்ரீநகர் நெடுஞ்சாலை மிகவும் கடுமையான பாதுகாப்புக்கு உட்படுத்தப்பட்டது ஆகும்.
 இராணுவ அல்லது ஆயுதப்படையினரின் வாகனங்கள் செல்லும் பொழுது தனியாரின் வாகனம் - எதுவும் அனுமதிக்கப்படக் கூடாது என்பது நடைமுறை விதி!

அப்படியிருக்கும் பொழுது ஒரு ஸ்கார்ப்பியோ வாகனம் - அதுவும் 350 கிலோ வெடிபொருட்களை ஏற்றிக்கொண்டு வீரர் களின் வாகனங்களை முந்துவதும் தாக்குதல் நடத்துவதும் எப்படி சாத்தியமாயிற்று?

இந்த கேள்விக்கு மோடி அரசாங்கமும் அவரது பிரதிநிதியாக உள்ள காஷ்மீர் ஆளு நரும் பதில் சொல்ல வேண்டிய நிலையில் உள்ளனர்.
தாக்குதல் நடந்ததற்கு காரணம் பாது காப்பு குறைபாடுதான் என ஆளுநர் சத்யபால் மாலிக் ஏற்றுக்கொள்ள வேண்டிய நிர்ப்பந்தம் உருவாகியுள்ளது.
 அதனை விசாரிப்போம் எனவும் ஆளுநர் கூறியுள்ளார்.
 என்னவிசாரித்தாலும் இழந்த உயிர்கள் மீண்டும் வருமா?


 இதே ஆளுநர் இன்னொரு முக்கிய மான உண்மையையும் கூறியுள்ளார்.
 இத்தகைய தாக்குதல்கள் நடக்க வாய்ப்பு உள்ளதாக உளவுத்துறை எச்சரிக்கை இருந்ததாகவும் ஒப்புக்கொண்டுள்ளார்.
 அப்படியெனில் ஏன்முன் எச்சரிக்கை நடவடிக்கைகள் எடுக்கப்படவில்லை?
 ஏன் நமது வீரர்களின் உயிர்கள் பாதுகாக்கப்படவில்லை?
வீரப்பன் என்கவுண்ட்டர் மற்றும் வெங்கடேச பண்ணையார் சட்டவிரோத என்கவுண்ட்டர் புகழ் விஜயகுமார்தான் காஷ்மீர் ஆளுநரின் ஆலோசகர் என்பது குறிப்பிடத்தக்கது.

பயங்கரவாதிகளை அழிக்கும் வல்லமை படைத்த ஜாம்பவான்கள் என தம்மை அழைத்துக் கொள்வோரின் திறமையின்மைதான் நமது வீரர்களின் மரணத்திற்கு காரணம் எனும் குற்றச் சாட்டு எப்படி தவறானதாக இருக்க முடியும்?

பொருத்தமான பதிலடி என்ன?
இந்த கோழைத்தனமான தாக்கு தலுக்கு பொருத்தமான பதிலடி தரவேண்டும் என பரவலான கருத்து எழுந்துள் ளது.
 “பொருத்தமான பதிலடி” எது என்பது தான் முக்கிய கேள்வி ஆகும்.
ஏற்கெனவே ஜம்மு பகுதியில் காஷ்மீர் முஸ்லிம் மக்கள் தாக்குதலுக்கு உள்ளாகியுள்ளனர். ச
ங்பரி வாரத்தினர் “அல்லாவின் பெயரை உச்சரிக்க எவரையும் அனுமதிக்க மாட்டோம்” எனவும்“முஸ்லிம்கள் இந்தியாவில் இருக்க அனு மதிக்க மாட்டோம்” எனவும் கூப்பாடு போட ஆரம்பித்துள்ளனர்.

மோடி யின் ரிபப்ளிக் தொலைக்காட்சி ‘‘இந்தியா பழிதீர்க்க வேண்டும்”எனும் டிவிட்டர் தொகுப்பில் “திருப்பி அடிப்ப தைத் தவிர இந்தியாவுக்கு வேறு ஏதாவது வழி உள்ளதா?” என ஆத்திரத்தைக் கட்டமைக்க முயல்கிறது.

மோடி ஆட்சியின் பொழுது குறிப்பாக கடந்த சில மாதங்களாக ஏராளமான தீவிரவாதிகள் கொல்லப்பட்டனர் என தினமும் தகவல்கள் வந்தன.
 அது உண்மையும் கூட! தீவீரவாதிகளை முழுவதுமாக ஒழித்துகட்ட “ஆபரேஷன் ஆல் அவுட்” எனும் தாக்குதல் நடத்தப்பட்டு வருவதாக மோடி அரசாங்கம் கூறியது.
ஆனால் புல்வாமா தீவிரவாத தாக்குதல் மோடி அரசாங்கத்தின் அணுகுமுறை குறித்து மிகப்பெரிய கேள்விக்குறியை எழுப்பியுள்ளது.
 தீவிரவாதிகள் ஒடுக்கப்பட்டு வரு கின்றனர் எனில் இத்தகைய மிகப்பெரிய தாக்குதல் எப்படி சாத்தியம் எனும் வாதம் எழுவது இயற்கையே!

இந்தியாவுடன் காஷ்மீர் ஏன் இணைந்தது?
1947ம் ஆண்டு இந்தியா விடுதலை அடைந்த பொழுது காஷ்மீர் இந்தியாவின் ஒரு பகுதியாக இருக்கவில்லை!
காஷ்மீர் மக்களிடையே கீழ்கண்ட மூன்று விருப்புரிமைகள் இருந்தன:
1) பாகிஸ்தானுடன் இணைவது.
2) இந்தியாவுடன் இணைவது.
3) தனி நாடாக இருப்பது.

இதில் எந்த முடிவை காஷ்மீர் மக்கள்எடுத்திருந்தாலும் அதனை ஏற்க வேண்டிய கட்டாயம் இந்தியா- பாகிஸ்தான் அரசுகளுக்குமட்டுமல்ல; ஐ.நா.உட்பட அனைவருக்கும் இருந்தது.

ஷேக் அப்துல்லா தலைமையிலான தேசிய மாநாடு கட்சி மக்களிடம் பெரும் செல்வாக்கு பெற்றிருந்தது. அவர்கள் எடுத்த முதல் முடிவு பாகிஸ்தானுடன் இணைவது இல்லை என்பதுதான்!
 இதனாலேயே ஷேக் அப்துல்லாவை முஸ்லிம் விரோதி எனவும் ரவுடி எனவும் ஜின்னா வசைமாரி பொழிந்தார்.
இந்தியாவுடன் இணைவது அல்லது தனி நாடாக இருப்பது எனும் இரு கருத்துகளுமே காஷ்மீர் மக்களிடையே வலுவாக இருந்தன.
இந்தியா- பாகிஸ்தான்- ஆப்கானிஸ்தான்- சீனா ஆகிய நாடுகள் சூழ்ந்திருக்கும் பொழுதுகாஷ்மீர் ஒரு சுதந்திர நாடாக இருப்பதில் உள்ளசிக்கல்களை ஷேக் அப்துல்லா உணர்ந்திருந் தார். இந்தியா தன்னை மதச்சார்பின்மை தேசமாக அறிவித்தது.
 இது காஷ்மீர் மக்களுக்குஓரளவு நம்பிக்கையை உருவாக்கியது.

தங்களது கலாச்சாரத்தையும் ஏழை விவசாயி களுக்கு நிலங்களை அளிக்கும் நிலச்சீர்திருத்த நடவடிக்கைகளை பாதுகாக்கவும் வேறு சில அரசியல் உரிமை களுக்கான உத்தரவாதங்களையும் காஷ்மீர் மக்கள் கோரினர். அத்தகைய உத்தரவாதங்கள் அளிக்கப் பட்டால் இந்தியாவுடன் இணைவோம் எனவும் கூறினர்.
இதற்காக உருவாக்கப்பட்டதே 370வது அரசியல் சட்டப்பிரிவு!

அந்நியப்பட்ட காஷ்மீர் மக்கள்
மத்தியில் ஆண்ட காங்கிரஸ் மற்றும் பாஜக அரசாங்கங்கள் 370வது பிரிவை நீர்த்துப் போகச் செய்தன. அதுவும் மோடி தலைமையிலான அரசாங்கம் காஷ்மீர் மக்களை அரசியல் ரீதியாக தனது ஆதாயத்திற்காக பகடைக்காயாக பயன்படுத்தியது.
 இராணுவம் மூலம் மட்டுமே காஷ்மீர் மக்களை வழிக்கு கொண்டு வந்துவிட முடியும் என கணக்கு போட்டது. காஷ்மீர் மக்களை அரசியல் ரீதியாக வென்றெடுக்காமல் பிரச்சனையை தீர்க்க இயலாதுஎன இடதுசாரிகளும் காஷ்மீர் வரலாற்றை அறிந்தவர்களும் தொடர்ந்து கூறிவந்தனர்.

ஆனால் மோடி அரசாங்கம் காஷ்மீர் மக்களுடன் எந்த ஒரு அரசியல் பேச்சுவார்த்தை க்கும் தயாராக இல்லை. இதன் காரணமாக காஷ்மீர் மக்கள் மேலும் மேலும் அந்நியப்பட்டனர். இது தீவிரவாதத்திற்கு வழி கோலியது. பாகிஸ்தானின் இந்திய விரோத செயல்களுக்கு வாய்ப்பை உருவாக்கியது.


தேர்தலுக்கும் இதற்கும் தொடர்பில்லையா?
பணி ஓய்வு பெற்ற இராணுவ அதிகாரி அலோக் அஸ்தானா கீழ்கண்ட நியாயமான கேள்வியை முன்வைக்கிறார்?
“இந்த தாக்குதலை நடத்திய ஆதில் அகமது பாகிஸ்தானி குடிமகனோ அல்லது பாகிஸ்தான் ஆக்கிரமிப்பு காஷ்மீர் பகுதி யிலிருந்து வந்தவனோ அல்ல. இந்த இளைஞன் உள்ளூர் காஷ்மீர் புல்வாமா பகுதியைசேர்ந்தவன்.
 படித்தவர்களும் வசதி வாய்ப்பு களும் உள்ள உள்ளூர் காஷ்மீரிகள் ஏன் இப்படிதங்கள் உயிரை மாய்த்துக் கொள்ள துணி கின்றனர்?
 இந்த கேள்விக்கு ஓரளவு பதில் காணமுயன்றாலே போதும், காஷ்மீர் பிரச்சனையைதீர்ப்பதற்கு வழிவகை உண்டாகி விடும்”- இந்திய இராணுவ அதிகாரியின் இந்த கருத்து நியாயமானதில்லையா?

வெளியுறவு அமைச்சக முன்னாள் அதிகாரி பத்ரகுமார் கீழ்கண்ட முக்கிய கேள்வியை முன்வைக்கிறார்:“இந்த தாக்குதல் ஏன் இந்த தருணத்தில் நடக்கிறது?
இது தற்செயலானதா?

2019 நாடாளுமன்ற தேர்தல்கள் பிரச்சாரம் சூடு பிடிக்க தொடங்கியுள்ளது. இந்த தருணத்தில் ஏன் இந்த தாக்குதல்?
இன்னும் ஓரிரு நாட்களில் தலிபானுக்கும் அமெரிக்காவுக்கும் ஆப்கானிஸ்தானில் பேச்சு வார்த்தை தொடங்க உள்ளது. அமெரிக்காவின் டிரம்ப், தனது படைகளை திரும்பப்பெற முனைகிறார்.
இந்த பேச்சு வார்த்தையில் அமெரிக்காவுக்கு உதவுவது பாகிஸ்தான்.
அப்படி எனில் பாகிஸ்தானை ஒரு எல்லைக்கு மேல் அமெரிக்கா கண்டிக்க முடியாத தருணமா இது?

 பிப்ரவரி 18ம் தேதியன்று தி ஹேக் நகரில் உள்ள சர்வதேச நீதிமன்றத்தில் குல்பூஷன் யாதவ் வழக்கு இறுதி விசார ணைக்கு வர உள்ளது.
 இந்தியாவும் பாகிஸ்தானும் மிகவும் கடுமையான வாதப்போரில் ஈடுபடும் சூழல் உள்ளது. இந்த தாக்குதலின் தருணம் அதனுடன் தொடர்புடையதா?
பத்ரகுமார் முன்வைக்கும் இந்த கேள்வி களும் புறம் தள்ள முடியாதவை.இந்த தாக்குதலை அனைத்து எதிர்க்கட்சிகளும் கண்டித்துள்ளன.

 எனினும் காஷ்மீரில் இராணுவ நடவடிக்கைகள் மூலம் மட்டுமே தீர்வு காணமுடியும் எனும் மோடி அரசாங்கத்தின் அணுகுமுறை மிகப்பெரிய பின்னடைவை சந்தித்துள்ளது.
அடிப்படையில் காஷ்மீர் மக்களை வென்றெடுக்க வேண்டும். அதற்கு அரசியல் கருத்துப் பரிமாற்றங்களும் அரசியல் தீர்வும் தேவை.
இதனுடன் இணைந்து தீவிரவாதத்திற்கு பாகிஸ்தானை ஆதரவு தராமல் இருக்க நிர்பந்திக்குமாறு உலக நாடுகளை வலியுறுத்த வேண்டும்.
இறுதியாக இராணுவ நடவடிக்கைகள் என்பது அரசியல் தீர்வுக்கு உட்பட்டதாக இருக்க வேண்டும்.
புல்வாமா தாக்குதல் மிகத்தெளிவாக கூறும் செய்தி இதுதான்!
இதனை மோடி அரசாங்கம் உணருமா என்பதுதான் மில்லியன் டாலர் கேள்வி!

                                                                                                                                                                                                         -அ.அன்வர் உசேன்

நன்றி:தீக்கதிர்.
 -------------------------------------------------------------------------------------------------------------------------------------
முதல்வர்,டிஜிபி இணைந்து காவல்துறையில் ரூ.88 கோடி முறைகேடு.
   -மு.க.ஸ்டாலின் குற்றசாட்டு.
காவல்துறையில் ரேடியோ சிஸ்டம் வாங்க விடப்பட்ட ரூ.88 கோடி டெண்டரில் முறைகேடு நடைபெற்றுள்ளதாக, முதல்வர் பழனிசாமி - டிஜிபி டி.கே.ராஜேந்திரன் மீது திமுக தலைவர் மு.க.ஸ்டாலின் குற்றம் சாட்டியுள்ளார்.

இதுதொடர்பாக  அவர் வெளியிட்ட அறிக்கை வருமாறு:

"சென்னையிலும், திருச்சியிலும் உள்ள காவல்துறைக்கு ‘டிஜிட்டல் ரேடியோ சிஸ்டம்’ உருவாக்கும் 88 கோடி ரூபாய் டெண்டரில் மிகப்பெரிய முறைகேடுகள் நடந்துள்ளன. ‘ஆப்கோ பிராஜெக்ட்’ என்ற பெயரில் காவல்துறையை நவீனமயமாக்கும் நிதியில் இருந்தும் மாநில அரசின் நிதியிலிருந்தும் செயல்படுத்தும் இந்தத் திட்டத்திற்கான டெண்டர் முறைகேடுகள் அதிமுக அரசின் கரி பூசிய ஊழல் முகத்தை மீண்டும் காட்டியிருக்கிறது.

2012-ல் தொடங்கப்பட்ட இந்தத் திட்டம் 38 கோடி ரூபாயில் முடித்திருக்க வேண்டியது. ஆனால், அதிமுக அரசின் கஜானாவில் கொள்ளையடிக்கும் கலையால் இந்தத் திட்டத்தின் மதிப்பு இன்றைக்கு 88 கோடி என்று உயர்ந்து அதிலும் மாபெரும் பகல் கொள்ளை நடைபெற்றுள்ளது.
இந்த டெண்டரில் ஒரே ஒருவரிடம் ஒப்பந்தம் பெற்று அவருக்கே காண்ட்ராக்ட் வழங்கப்பட்டுள்ளது.
சென்னை மெட்ரோ ரயில் சுரங்கப் பாதைகளில் இந்த ரேடியோ டிஜிட்டல் சிஸ்டம் இயங்காது. ஆனால், டெண்டரின் முக்கிய நோக்கமே சுரங்கப்பாதைகளிலும் இந்த சிஸ்டம் செயல்பட வேண்டும் என்பதுதான்.

இந்த டெண்டர் போட்டவர் என்ன விலை கேட்டாரோ அந்த அதிக விலையை எவ்வித தயக்கமுமின்றி டிஜிபி டி.கே ராஜேந்திரன் அளித்திருக்கிறார்.
இந்த முறைகேடுகளின் பட்டியல், ஒரு டெண்டரை எப்படி முடிவு செய்யக்கூடாதோ அந்த அளவுக்கு மோசமாக முடிவு செய்யப்பட்டுள்ளதை வெளிக்கொண்டு வந்திருக்கிறது.
 ஊழல் செய்ய வேண்டும் என்பதை மட்டுமே ஒற்றை நோக்கமாக வைத்து ஒப்பந்தம் வழங்கப்பட்டுள்ளது. டெண்டர் போட்டவருடன் முறைப்படி பேச்சு நடத்தி விலையைக் குறைக்க எந்த முயற்சியும் எடுக்கவில்லை. டெண்டரில் செலுத்த வேண்டிய வரி பொறுப்புகளை ஒப்பந்ததாரரே ஏற்றுக்கொள்ள வேண்டும் என்று டெண்டர் விதிகள் இருந்தபோதிலும் அவருக்கு ஜிஎஸ்டி தனியாக 5 கோடி ரூபாய் அனுமதித்துள்ளார்.

டெண்டரில் உள்ள அனைத்து பொருள்களுக்கும் கற்பனைக்கு எட்டாத அளவுக்கு பல மடங்கு அதிக விலை கொடுக்கப்பட்டுள்ளது.
 மொபைல் தொடர்பான சாதனங்களிலும் கையடக்கத் தொடர்பான சாதனங்களிலும் மட்டும் 23 கோடி ரூபாய்க்கு மேல் அதிகம் ஒப்பந்ததாரருக்கு கொடுக்கப்பட்டு அரசுக்கு கண்ணை மூடிக்கொண்டு இழப்பு ஏற்படுத்தப்பட்டுள்ளது.
இப்படி வரலாறு கண்டிராத டெண்டர் முறைகேடுகள் செய்து அரசுக்கு 88 கோடி ரூபாய் இழப்பு ஏற்படும் அளவுக்கு டிஜிபி டி.கே. ராஜேந்திரனும் இந்தத் துறையை கையில் வைத்திருக்கும் முதல்வர் எடப்பாடி பழனிசாமியும் இணைந்து ஊழல் செய்திருப்பது வேதனையானது மட்டுமல்ல - வெட்கக்கேடானது.

இந்த சட்டவிரோத சலுகைகளையும் அப்பட்டமான விதிமீறல்களையும் உள்துறைச் செயலாளர் சுட்டிக்காட்டி டிஜிபியிடம் கேள்வி எழுப்பிய பிறகும் இந்த டெண்டரை முறைகேடாக அளித்திருக்கிறது டி.கே ராஜேந்திரன் - பழனிசாமி கூட்டணி

காவல்துறைக்கு தலைவராக இருக்கும் டி.கே ராஜேந்திரன் ஊழல் செய்வதற்கு முதல்வர் பச்சைக் கொடி காட்டுவது மட்டுமின்றி பாதுகாப்பாகவும் நிற்பது தமிழக காவல்துறைக்கு தலைக்குனிவை ஏற்படுத்தி இருக்கிறது.
88 கோடி ரூபாய் ‘டிஜிட்டல் ரேடியோ சிஸ்டம்’ டெண்டரில் நடைபெற்றுள்ள இந்த ஊழல் குறித்து, தமிழக மக்களின் பேராதரவுடன் திமுக ஆட்சிக்கு வந்ததும் நிச்சயம் கடுமையான நடவடிக்கை எடுக்கப்பட்டு, ஊழல் செய்தவர்கள் ஊழலுக்கு துணை நின்றவர்கள் அனைவரும் குற்றவாளிக் கூண்டில் நிறுத்தப்படுவார்கள் என்று எச்சரிக்க விரும்புகிறேன்.

இவ்வாறு மு.க.ஸ்டாலின் தெரிவித்துள்ளார்.
--------------------------------------------------------------------------------------------------------------------------------------

ஷேக்கினா.

  கேரள தொலைக்காட்சிகளில் ஒரு கத்தோலிக்க ஜிகினா !   கத்தோலிக்க திருச்சபை லீலைகளை மறைக்கும் திரைச்சீலை ! ப ண்டைய எபிரேயு மொழியில் “ஷேக்...